Дејвид и Викторија Бекам сакаа да обезбедат комфорен привремен дом додека престојуваат во Америка, па не штедејќи средства тие избраа летото да го поминат во луксузна куќа во Малибу, Калифорнија.
Прекрасната куќа од скоро 1000 метри квадратни вклучува 7 спални соби, 9 бањи и фантастичен поглед на плажа. Според американските медиуми, изнајмувањето на оваа куќа која е проценета на 27 милиони долари ќе ги чини Бекамови по 158 753 долари месечно.
Бремената Викторија веќе закажала породување со царски рез на 4 јули, на Денот на независноста на САД. Се смета дека првата ќеркичка на Бекамови ќе ги помине првите месеци од животот токму во оваа куќа.
Според британскиот The Sun, Дејвид и Викторија размислуваат да ја крстат својата ќерка Атланта. „Дејвид сакаше име кое ќе има некаква поврзаност со нивните животи за време на нејзиното зачнување“ – изјавил близок до семејството. Атланта доаѓа од Атлански Океан, којшто Дејвид и Викторија го прелетале многупати во изминативе години, бидејќи постојано патуваат на релација Англија–Америка.
Се верува дека Бекамови повторно ќе се преселат во Англија во ноември, кога ќе заврши договорот на Дејвид со LA Galaxy.
