Хју Џекман и Дебора Ли-Фернес се во брак повеќе од 22 години, но хемијата меѓу нив сè уште постои. Славниот пар синоќа зачекори во елегантно издание на црвениот тепих пред музејот на уметноста „Метрополитен“.
62-годишната актерка и продуцентка носеше црна готска креација и накит од Лорејн Шварц, а 49-годишниот актер избра црн костум.
Џекман сподели фотографија на Instagram и напиша: „Вечерен состанок на епско ниво“.
Хју и Дебора се запознаа во 1995 година на снимањето на австралиското ТВ шоу „Correlli“. Тие стапија во брак една година подоцна. По два спонтани абортуси, познатиот пар посвои две деца, Оскар и Ава.
Пред неколку години, Џекман отворено зборуваше за борбата со неплодноста и посвојувањето: „Да бидеме јасни, јас отсекогаш сакав да посвојам. Тоа секогаш беше наш план. Не знаевме кога ќе се случи, но биолошки се обидовме да имаме деца и тоа не се случи. Поминавме низ ин витро и Деб имаше неколку спонтани абортуси. Никогаш нема да го заборавам спонтаниот абортус, тоа се случува на една од три бремености, но многу, многу ретко се зборува за тоа.“
