Ванеса Брајант со трите ќерки му оддадоа почит на покојниот Коби Брајант.
40-годишната сопруга на кошаркарската легенда со Наталија, Бјанка и Капри присуствуваа на церемонија во Кинескиот театар во Лос Анџелес, каде беа изложени цементирани отпечатоци од дланките и стапалата на Коби.
На настанот, говор одржа најголемата ќерка на Коби и Ванеса, Наталија. Таа зборуваше за бројните ангажмани и напорната работа на нејзиниот татко, но истакна дека и покрај сè, тој наоѓал време за семејството.
„Почестена сум што сум денес тука за да му оддадам почит на човекот кој сите го знаеме и сакаме, татко ми.“
„Тоа што сум негова ќерка е една од најголемите радости во мојот живот и се надевам дека ќе ги негувам и ценам многуте лекции на кои ме научи. Овој ден е симбол на влијанието кое тој го имаше на градот кој толку многу го сакаше и за кој се грижеше.“
„Ве охрабрувам да ги ставите вашите раце на неговите и да одделите момент за да застанете во неговите чевли. Ова е богатство за Лос Анџелес и за фановите на татко ми низ целиот свет“
„Тато, ти си икона, легенда, раскажувач на приказни и најважното, најдобриот татко на девојчиња за каков што секоја млада жена сонува. Почестена сум што сум тука за да те претставувам тебе и нашето семејство. Екстремно се гордееме со тебе. Засекогаш ќе те сакаме“ – меѓу другото рече таа.
Коби и неговата ќерка Џиана го загубија животот во хеликоптерска несреќа на крајот од јануари 2020 година.
