Замина во легендите: Бора Чорба почина на 71-годишна возраст

Борислав Бора Ѓоргевиќ замина во легендите. Вокалистот на рок групата Рибља чорба, кој беше познат како Бора Чорба, почина на 71-годишна возраст.

Тажната вест за неговата смрт беше споделена на официјалниот профил на Рибља чорба, а во соопштението пишува:

Бора беше вокалист на Рибља Чорба од нејзиното основање во 1978 година. Неговото здравје долго време беше во критична состојба, а пред една недела одекна и лажна вест за неговата смрт.

Тој почина во болница во Љубљана, а според српските медиуми, имал проблеми со белите дробови.

Борислав Бора Ѓорѓевиќ е роден на 1 ноември 1952 година во Чачак. Својата младост ја поминал во Белград, а со музика се занимава од својата 13-та година.

Низ 70-тите години од минатиот век, тој основал многу бендови, како Заједно, Сунцокрет и Рани мраз (со Ѓорѓе Балашевиќ). Но, најголемата слава ја доживеа со Рибља чорба, која ја основаше во 1978 година.

Во текот на својата кариера, стана еден од најконтроверзните вокалисти во тоа време. Во 1990 година, Бора го издаде албумот „Коза ностра“, по што бил тужен за навреда на работничката класа на Југославија. Тој бил голем противник на владеењето на Слободан Милошевиќ и тој негов став го изразил преку албумот „Њихови дани“, кој го издал сам, без учество на својата група.

Бендот Рибља чорба важи за еден од најзначајните рок бендови од овие простори. Низ четиридецениското работење, популарната група сними 20 студиски албуми.

Бора има објавено и десетина книги, а неговата стихозбирка „Пустински остров“ освои награда од Академијата „Иво Андриќ“ во 2018 година.