Блогерството ѝ помогна на Кијара Ферањи да изгради модна империја. Нејзиниот пат до светската слава е раскажан во документарниот филм „Chiara Ferragni - Unposted“, чија премиера синоќа се одржа во рамките на Филмскиот фестивал во Венеција.
32-годишната блогерка зачекори на црвениот тепих во блескава креација од Диор и гордо позираше пред фотографите. Шармантната Италијанка беше придружувана од пејачот Федез, со кого е во брак една година и има мало синче.
Кијара е една од блогерките со највисока заработка. Талентираната креаторка на блогот „The Blonde Salad“ веќе неколку години покажува дека има и талент за дизајнирање. Благодарение на страста кон модата, таа денес поседува две компании кои вредат 11 милиони долари.
Кијара се вери со Федез во мај 2017 година, кога тој ја запроси сред негов концерт. Тие го добија првото дете во март 2018 година, а стапија во брак неколку месеци подоцна во септември.
На премиерата присуствуваа и двете сестри на Кијара, Валентина и Франческа, и нејзината мајка Марина.
