Рејчел Шентон доби Оскар за филмот „The Silent Child“, а својот говор го искористи за да оствари ветување кое му го дала на глуво девојче со кое глуми во наградениот филм.
Имено, 30-годишната актерка ѝ ветила на 6-годишната Мејзи Слај дека доколку добијат награда за заедничкиот филм, ќе одржи говор на знаковен јазик и токму тоа и го направи.
Шентон ја прими златната статуетка за Најдобар краткометражен филм за „The Silent Child“ чие сценарио го напишала самата таа, инспирирана од приказната за нејзиниот татко кој го изгубил слухот како последица на хемотерапија.
„Ѝ дадов ветување на нашата шестгодишна главна актерка дека ќе зборувам и на знаковен јазик. Се извинувам што ми се тресат рацете. Нашиот филм е за глуво дете родено во светот на тишината. Сторијата не е преувеличена за филмот, ова се случува. Милиони деца ширум целиот свет живеат во тишина и се соочуваат со комуникациски бариери и особено пристап кон образование. Глувоста е тивка попреченост, не можеш да ја видиш и не е опасна по живот. Затоа благодарна сум што Академијата ни дозволи да ја поставиме оваа тема пред публиката“ – вели Рејчел во говорот.
ВИДЕО
Британската ѕвезда на црвениот тепих се појави со слатката Мејзи и вереникот Крис Овертон, кој е режисер на наградениот филм.
Шентон доби бројни пофалби за овој потег, кој испраќа порака за инклузивност на лицата со попреченост во сите сфери од животот.
