Тина Тарнер конечно реши да му каже „Да“ на Ервин Бах со кого е во врска веќе 27 години. Легендарната пејачка и германскиот продуцент стапиле во брак на брегот на Циришкото Езеро.
Ервин и Тина
73-годишната музичка дива и нејзиниот 57-годишен партнер планираат свечена забава во нивниот дом покрај езеро. На забавата се очекува да присуствуваат многу славни лица како Дејвид Боуви, Шаде и Опра. Гостите биле замолени да носат бела облека, а се верува дека Тарнер ќе носи венчаница од Џорџо Армани.
Тарнер и Бах се сретнале во 1985 година. Познатата пејачка, која речиси 20 години живее во Швајцарија, неодамна доби швајцарско државјанство.
Ова е втор брак на славната изведувачка на хитовите „Simply the Best“, „River Deep, Mountain High“ и „What's Love Got to Do with It“. Во 1962 година таа се омажи со Ајк Тарнер, кој постојано ја малтретираше физички за време на нивниот брак. Во 1976 таа поднесе документи за развод, а подоцна во своите мемоари го обелодени семејното насилство кое се случувало во нејзиниот дом.
Тарнер е една од најуспешните музички ѕвезди. Добитник е на 8 Греми награди, а според Rolling Stone е еден од најдобрите пејачи на сите времиња. Неодамна таа стана највозрасната личност која кога било се има појавено на насловна на „Вог“.
Тина за „Вог“ Германија
