Кармен Дел Орефиче нема намера да го отстапи своето место во светот на модата, иако е во деветтата деценија од животот. Грациозната дама е најстариот модел на светот кој сè уште работи, а со својата уникатна убавина продолжува да добива корици на списанија и рекламни кампањи.
83-годишната Американка самоуверено позираше за мартовското издание на списанието „New You“ и по кој знае кој пат привлече илјадници позитивни коментари.
Седата коса и истакнатите јаболкници ѝ даваат препознатливост на шармантната Кармен, која на 13 години позирала за Салвадор Дали, а на 15-годишна возраст за првпат се појавила на насловна страница на „Вог“.
Кармен убедливо вели дека за неа возраста е само бројка и додава дека во изминативе 25 години била почесто ангажирана од модни брендови и списанија отколку во младоста.
За фотосесијата за „New You“ бил задолжен албанскиот фотограф Фадил Бериша.
Зачуваниот изглед на Кармен донекаде е резултат на мајката природа, но таа не се срами да признае дека користи инјекции за подобрување на изгледот. „Ако вашиот таван паѓа, нема ли да го поправите?“ – изјави таа пред неколку години, одговарајќи на прашањето кое си го поставува секоја жена што ќе ја здогледа.
