Музичките ѕвезди парадираа во срцето на Лос Анџелес пред почетокот на 57. издание на „Греми“ со идејата да остават силен впечаток и да привлечат позитивни критики. На некои им се исполнија стилските желби, но други пак привлекоа коментари поради лошиот моден избор.
Невозможно беше да се пропушти присуството на Ријана, која за свечената вечер избра розов фустан од високата мода на Џамбатиста Вали. Волуменозната креација ги подели критичарите и изнуди спротивставени одговори на прашањето: „Моден хит или модно промашување?“
Следејќи го стилот од својот нов спот за песната „Living for Love“, Мадона зачекори на црвениот тепих во креација од Живанши инспирирана од облеката на матадорите. Но, Мадона не е Мадона ако не крене зад себе врева. Така, во еден момент музичката дива го подигна задниот дел на кратката креација и го покажа својот задник пред фото-репортерите.
Бијонсе ги заобиколи стилските експерименти и избра „безбеден“ стајлинг. Црниот фустан со длабоко деколте од Проенза Скулер таа го надополни со скапоцен накит со смарагди.
Кети Пери му го довери својот изглед на Зухаир Мурад, Џеси Џеј изгледаше модерно и елегантно во црна креација на Ралф и Русо, Тејлор Свифт позајми креација од ателјето на Ели Сааб, Рита Ора буквално блесна во фустан од Прада, Гвен Стефани пленеше со црн комбинезон од високата мода на Версаче, а Лејди Гага заведуваше во сексапилна креација од Брендон Максвел. Ким Кардашијан со блескавата креација од Жан Пол Готје која наликуваше на ноќница, си обезбеди место меѓу најлошо облечените гостинки.
Погледнете како изгледаа ѕвездите и оценете го нивниот стил.
