Ралф Лорен зад себе има над половина век присуство на модната сцена, па не чувствува притисок да организира екстравагантни ревии за да остави силен впечаток, туку дозволува самите креации да зборуваат за неговиот талент.
79-годишниот дизајнер ја презентира колекцијата есен/зима 2019 во „кафулето на Ралф“ во неговото ателје во Њујорк. Гостите седеа на маси и уживаа во кафе и мини кроасани додека манекенките грациозно се движеа во најновите креации.
„Сакав да креирам интимно искуство за да ја споделам мојата визија на личен начин“ - изјави Лорен.
Стишен гламур и урбана женственост зрачеа од креациите, а ограничената палета од црна, бела и златна боја придонесе целиот моден спектакл да биде уште попријатен за око.
Бела Хадид, Кендис Сванапул и Џоан Смолс беа меѓу манекенките, a Карли Клос и Роузи Хантингтон-Вајтли уживаа во публиката.
