Повеќето членови на друштвената мрежа Facebook меѓу онлајн пријателите имаат вистински пријатели и „пријатели“ (другарка на другарката на сестра си, пријател на колегата од работа итн.).
И се разбира, невозможно е да не се случи некој од нив да испрати пост што ќе ве натера да ги „превртите“ очите неколку пати.
Ново истражување покажа дека 85% од жените се иритираат од постови на дел од своите Facebook пријатели.
Но, што точно ги нервира жените? 63% изјавиле дека се иритираат што некои пријатели постојано се жалат, на 42% им е преку глава од пријатели кои ги споделуваат своите политички ставови, на 32% им одат на нерви пријатели кои се фалат за нивните навидум совршени животи.
Учесничките во истражувањето исто така требало да проценат со какви личности се пријатели на Facebook. Еве ги резултатите:
- 65% се пријатели со „документарецот“ – личност која постојано ве известува што ѝ се случува во животот.
- 61% се пријатели со „кралицата на драмата“ – личност која постојано е во криза за нешто.
- 57% се пријатели со „гордата мајка“ – личност која ве известува за секој чекор на нивното дете.
- 46% се пријатели со „лајкерот“ – личност која лајкува сè живо и диво.
- 40% се пријатели со „позерот“ – личност која го претставува својот живот како совршен.
- 40% се пријатели со „кликтивистот“ – личност која се зачленува во Фејбук групи кои поддржуваат одредена хуманитарна акција, кауза, идеја или ја зголемуваат свеста на јавноста за постоењето на некој проблем.
- 30% се пријатели со „секогаш подобриот“ – што и да стигне до нејзиниот News Feed, оваа личност секогаш има поинтересна и поневеројатна приказна или подобар повод за фалење. Нејзините коментари обично започнуваат со: „Ех, тоа не е ништо. Мене ми се случи...“
- 26% се пријатели со „ретуширачот“ – личност која ги ретушира сите свои слики за да изгледа попривлечна.
- 25% се пријатели со „демначот“ – личност која ви го следи секој пост и секоја активност на Facebook.
- 25% се пријатели со „(не)пријателот“ – личност која истовремено ви е и пријател и непријател или непријател под прикритие.
И покрај тоа што понекогаш се нервираат поради постовите на пријателите, жените го ценат Facebook, најмногу затоа што можат да им ги гледаат сликите и видеата на пријателите (91%) и затоа што им помага да се поврзат со старите пријатели (76%).
