Жителите на Финска се најсреќни на светот. Денес беше објавен „Светскиот извештај за среќа“ (World Happiness Report) и рангирањето на 156 држави.
За да се стигне до финалното подредување на државите, биле земени предвид различни фактори како корупција, социјална поддршка од пријатели и семејството, бруто домашен производ, дарежливост и слобода на избор.
Финска ја зазеде челната позиција. „Вистина е дека изминатава година Финците беа посреќни од жителите на останатите држави, но и нивните имигранти се најсреќните имигранти во светот. Финците се грижат еден за друг. А токму на такво место луѓето сакаат да живеат“ - изјавил професорот по економија Џон Хеливел.
Зад Финска се најдоа Данска, Норвешка, Исланд и Холандија.
На самото дно се наоѓаат Јужен Судан, Централноафриканската Република и Авганистан.
А каде е Македонија?
Нашата држава беше рангирана на средината на листата, поточно на 84. место. Само две места погоре се наоѓа Грција, а помалку среќни од нас се Бугарија (97. место) и Албанија (107. место).
Најсреќни земји од регионот се Словенија и Косово, кои застанаа на 44. и 46. место.
Србија е на 70. место, Хрватска на 75. место, а Босна и Херцеговина на 78. место.
