Жените страдаат од повеќе симптоми на стрес во споредба со мажите, покажало ново шведско истражување. Научниците веруваат дека причината за тоа е што жените работат „двојна смена“, т.е. изложени се на стрес и на работа и дома.
Со истражувањето било откриено дека кај жените повеќе се појавуваат класичните симптоми на стресот (како болки во вратот и грбот) отколку кај мажите.
Жените почесто страдаат од симптомите на стресот отколку мажите
Во текот на 4 години истражувачите набљудувале две групи составени од мажи и жени. Едната група ја сочинувале студенти, а другата работници.
На крајот било заклучено дека во групата на студентите жените почесто имале болки во вратот, а во групата на вработените (најголем дел од кои работеле на компјутер), кај жените почесто се појавувала болка и во вратот и во грбот.
Оваа појава научниците ја објаснуваат со фактот што во развиените земји секоја жена исполнува т.н. „двојна смена“, односно оди на работа исто како и мажите, но кога ќе се врати дома, нејзината работа продолжува низ домот.
А во однос на студентите, шведските научници сметаат дека студентките чувствуваат поголем стрес затоа што мораат да се натпреваруваат во светот на мажите и да бидат подобри од нив за да ги добијат врвните работни позиции.
