Кој би помислил дека посета на Дизниленд може некому комплетно да му го промени животот?
Мајка на три деца ја преполови својата тежина откако не ѝ дозволиле да се вози во забавниот парк затоа што не можеле да ја врзат со сигурносниот појас.
Кристина Џордан пред девет години тежела 123 килограми, а сега води здрав живот и се грижи за своето тело, со што нејзината телесна тежина достигнала до 59 килограми.
„Јас и моето семејство чекавме во редицата два часа за да се качиме на една од лудите железници и ни беше жешко и бевме нетрпеливи. Кога конечно дојдовме на ред да седнеме, сигурносниот појас на седиштето не ме закопчуваше“ – изјавила Џордан за People.
„Се извинувам госпоѓо, не ве собира, вие сте преголема за ова“ – со овие зборови ѝ се обратила вработената во забавниот парк.
Засрамена, Кристина станала и се упатила кон излезот, но тогаш следувал клучниот момент кој ја мотивирал да го промени својот изглед.
„Станав набрзина и кога си заминував не ме собираше преку шалтерот за излегување. Колковите ми беа прешироки, па тие мораа да ја отворат портата. Се почувствував како добиток кој го носат на колење. Тоа беше најсрамниот момент во мојот живот. Но исто така, ми ги отвори очите кон фактот дека морам да се променам“ – додала Кристина.
По бројни диети, 34-годишната мајка решила дела не сака да биде само слаба, туку дека најважно ѝ е да биде здрава.
„Започнав да читам сè што можев да најдам за исхраната. Одлучив да престанам да си создавам стрес целејќи да бидам слаба и да се фокусирам на тоа да бидам здрава. Сега јадам пет пати повеќе одошто кога бев дебела“ – вели таа.
„Сфатив дека ќе бидам најдобрата мајка и најдобрата сопруга ако бидам јас во најдобро светло“ – истакнува Џордан и тврди дека здравиот начин на живот ѝ помогнал да го победи дијабетесот.
