Бременоста е магичен процес кој резултира со раѓање на нов живот. Но, како што расте малото бебе, така се менува телото на мајката. Во многу случаи бременоста остава трајни лузни по телото како стрии и овисната кожа, па многу жени по раѓањето имаат пониска самодоверба и се потиштени поради притисокот да си го вратат телото во форма.
Џејд Бил е фотографка која преку своите фотографии покажува како навистина изгледаат новите мајки, несовршени, но не помалку убави. Нејзината цел е да ја подигне самодовербата на мајките и да ја редефинира убавината.
Сите фотографии од нејзината книга „A Beautiful Body“ се направени со мајки кои доброволно се пријавиле за фотосесија за да ги покажат несовршеностите на своето тело. Сè започнало кога Џејд објавила полуразголени фотографии од своето тело по првата бременост. Фотографиите допреле до стотици мајки кои изразиле желба да позираат и да го покажат телото по породувањето во вистинско светло.
„Да, се растегнав физички додека растев емотивно и духовно за да израснам луѓе во внатрешноста на моето тело и да ги хранам од ова тело. Да, јас сум секси. Да, никогаш нема да бидам иста како порано. Да, јас сум Мајка. Ох, да, горда сум. Да, ранлива сум. Да, силна сум како куќа. Да, јас сум ви сестра. Да, и јас имам своја приказна. Да, јас сум ваша рефлексија“ – пишува Џејд.
Џејд привлече огромно внимание со својот проект. Во интервју за Huffington Post, таа објаснила дека во текот на целиот живот страдала од недостиг на самодоверба поради надворешниот изглед и дека се стреми да ги поттикне луѓето да не си го трошат скапоценото време мразејќи се себеси, како што го правела тоа таа.
„Како тинејџерка страдав од чувства на длабока безвредност. Имав акни и не можев да се погледнам во огледалото речиси три години, освен ако тоа не беше поставено на светлина од свеќи... Се здебелив 22 килограми во текот на бременоста и тоа ја збогати мојата лична историја на опсесивна омраза кон себе во култура која слави најмногу фотошопирани фотографии од жени во медиумите. Соочени сме со епидемија од жени кои чувствуваат дека не заслужуваат да бидат наречени убави. Речиси секоја од нас се мачи да се чувствува убаво во сопствената кожа. Мојот сон е да бидам дел од движење за да бидеме подобри кон себе и кон другите и да бидам сведок на генерација од млади луѓе кои не си трошат години од скапоцениот живот на омраза кон себе затоа што мислат дека не се убави, како што правев јас“ – објаснила таа.
Џејд во петтиот месец од бременоста и по породувањето
Џејд планира во идните проекти да навлезе во теми како стареење, рак и нарушувања во исхраната.
