Децата обожаваат да си играат со кукли. Но, за нив е многу важно да имаат кукли во кои ќе можат да се препознаат себеси и преку кои ќе се спознаваат и себеси и светот.
За жал, за децата кои имаат здравствени проблеми или изгледаат различно од другите деца најчесто нема кукли со кои ќе можат да се асоцираат и поврзат. Тоа го забележала Клер Товел од Британија и одлучила да преземе нешто.
Таа ја создала „Bright Ears UK“, непрофитна организација која модифицира кукли за да ги прилагоди на здравствените состојби на децата. Целта на Клер е секое дете со хендикеп да си игра со кукла како него.
Нејзина најголема инспирација била ќеркичката Матилда која е глува.
„Бев обесхрабрена кога не можев да најдам кукла и каква било играчка со слушно помагало. Ми се чини дека општеството не го смета ова за важно и поради тоа не треба да се преземе нешто“ – рекла Клер.
Во период од три години, Клер има продадено повеќе од 2 илјади кукли. Таа се надева дека ќе ги охрабри децата и дека ќе промовира инклузивност. Нејзин сон е децата со здравствени проблеми да можат да си купат кукла како нив на рафтовите во продавниците за на тој начин да се чувствуваат нормално.
