Мајка го сруши Гинисовиот рекорд за најголема донација на мајчино млеко од една личност.
Елизабет Андерсон-Сиера донираше речиси 1.600 литри мајчино млеко во периодот меѓу февруари 2015 и јуни 2018 година во повеќе непрофитни банки за млеко. Ова е само дел од вкупната количина на млеко која таа реално ја има донирано низ годините.
Елизабет страда од синдром на хиперлактација, ретка состојба при која телото произведува прекумерно количество мајчино млеко. Според нејзините пресметки, таа досега има донирано над 10.000 литри млеко на локални семејства и реципиенти со забавен развој, менувајќи илјадници животи.
„Тоа што можам да променам нешто во толку многу приказни ми значи сè. Тоа се позитивните нешта на кои се фокусирам и причина зошто продолжувам да го правам она што го правам“ – рекла таа, објаснувајќи ја нејзината состојба.
„Имам зголемена хипофиза која лачи пролактин многу повеќе од нормалното. Со тој прекумерен вишок пролактин, моето тело прави млеко само по себе. Ако не испумпувам за да го намалам притисокот, започнуваат да ми се случуваат нешта како воспаление или маситис“ – рекла таа.
Синдромот ѝ бил дијагностициран во пролетта 2015 година, но првите симптоми ѝ се појавиле уште во 2014 година, за време на бременоста со првото дете.
За телото да престане да произведува млеко, Елизабет вели дека една од опциите е да направи двојна мастектомија за отстранување на ткивото кое создава мајчино млеко.
„И понатаму ќе имам многу пролактин во телото, но нема да ги засега рецепторите кои го користат за да прават повеќе млеко“ – објаснила таа.
Поради тоа што нејзината состојба влијае на нормалниот начин на функционирање, Елизабет не би му ја посакала на никого. Но, среќна е што може да им помогне на мајките кои немаат доволно млеко за нивните малечки.
„Можеби ќе го посакате сето ова млеко, но навистина не е така. Навистина ги охрабрувам мајките да не се споредуваат со другите. Сите ние сме уникатни и што и да прави вашето тело е совршено за вашето патување. Секоја капка е важна. Ги охрабрувам мајките да го сакаат нивното патување, без разлика како изгледа“ – вели таа.
