Деновиве започна со работа првата и единствена е-библиотека со дела од македонски автори. Со едноставно и бесплатно зачленување на сајтот www.makedonika.mk имате пристап до дела од нашите преродбеници, македонските класици, одбрана детска литература, како и до многу дела од наши современици. Сите е-книги се бесплатни и се објавени во посебен формат, за што е развиен врвен софтвер.
Ова е единствена е-библиотека од овој вид во светот. Фондацијата за зачувување на македонското културно наследство Македоника стои позади овој проект од најголем национален интерес.
Придобивките се многубројни: од зачувување на сите дела што се од непроценлива важност за македонскиот јазик и македонската нација, преку обезбедување бесмртност на највредните дела од современата македонска литература, па сè до објавување дела од нови автори за кои јавноста допрва ќе дознае.
„Книга на ден“ е мотото со кое Македоника се обврзува на своите читатели да им подари нова е-книга секој ден во годината. Бесплатна и достапна за сите.
Мисијата на Македоника е да се поттикне читањето кај сите генерации независно дали се наоѓаат во својата матична земја, дали се малцинство во некоја соседна држава или се дел од милионската дијаспора. Преку истата платформа ќе се промовираат и неколку необјавени книги месечно, од многуте талентирани пишувачи, кои на овој начин побргу ќе се вивнат во македонското литературно небо. Илјадниците членови на Македоника ќе одлучат кој од овие автори ќе биде комета, а кој ќе се промовира во ѕвезда.
