Атласот на убавината: Портрети на жени од целиот свет

Михаела Норок е создателка на проектот „Атласот на убавината“, кој е огледало на различните општества и инспирација за луѓето кои се трудат да останат автентични.

Младата фотографка патува низ светот и фотографира жени, обидувајќи се да ја долови нивната уникатна убавина и спецификите на нивната култура. 30-годишната Романка дала отказ и со заштедените пари посетила 37 земји низ светот.

„На ова патување, фотографирав стотици природни жени, опкружени со нивната култура. Мојот проект е наречен The Atlas of Beauty и со него сакам да ја покажам разновидноста на нашата планета преку портрети на жени“ – објаснува таа.

„Од Западна Европа до африканските племиња, од Рио де Жанеиро до Кина, на моите фотографии се обидувам да прикажам природни и разнообразни лица. Мое мислење е дека убавината значи да го одржиш во живот своето потекло и својата култура. Да бидеш природна, искрена, автентична, посебна, а не во мода или слаба. Можеби за 50 години сите жени од целиот свет ќе се облекуваат и однесуваат исто. Се надевам дека мојот проект ќе остане да сведочи за културите и традициите на мојата ера“ – пишува Михаела на својот сајт.

Убавината е насекаде, а фотографиите на Михаела се доказ за тоа.