Љубовта е посилна од короната...
Пар од Италија, кој е болен од КОВИД-19 и се лекува на интензивна нега, ја одбележа 50-годишнината од бракот држејќи се за раце.
71-годишната Сандра и 73-годишниот Џанкарло ја „прославија“ златната годишнина со помош на медицинските лица кои се грижат за нив. Здравствените работници ги поставија нивните кревети еден до друг, за тие да можат да се држат за раце и да си ја дадат својата поддршка.
Медицинските лица им подарија мини колачи. На едниот колач беше поставена свеќичка со број 5, додека на другата 0.
„Сандра плачеше многу, не за себе, туку затоа што беше загрижена за сопругот“ – изјавила една од медицинските сестри. „Тој ми кажа колку многу ја сака и по толку многу години. Па кога дознав дека им е годишнина, ми дојде идејата да ја прославиме“ – додала таа.
„Тоа беше неверојатен момент, прекрасен. Со тие минути ни се исплати цела жртва која ја направивме деновиве. Тој постојано повторуваше колку ја сака, сите ние плачевме. Во воздухот се чувствуваше љубовта по која трагаме цел живот. Родени за да бидат заедно“ – додаваат од медицинскиот персонал.
Според информации кои ги пренесуваат странските медиуми, Сандра и Џанкарло сега се во добра здравствена состојба и може заедно да бидат пуштени од болница.
