Нема да имате ниту еден здодевен ден во претстојната година, којашто ќе биде управувана од Дрвениот Змеј. На 10 февруари милијарди лица од Кина и други азиски земји го прославија доаѓањето на Лунарната Нова година, којашто ќе трае до 29 јануари 2025 година.
За разлика од претходната Година на Зајакот, кога сите се стремевме кон мир, стабилност и одмор, во Годината на Змејот постојано ќе бидеме во акција. Змејот е единственото митолошко суштество во кинескиот зодијак кое не е животно и е многу почитувано. Врзете го појасот, ни претстои лудо, но интересно возење.
Змејот во Кинескиот зодијак е симбол на среќата, силата, харизмата и амбициите. Годините управувани од Змејот се периоди кога луѓето сакаат да родат дете, бидејќи се смета дека тоа ќе биде моќно, амбициозно и среќно. Се очекува 2024 да биде „бејби-бум“ период.
Ако копнеевте по промени, сега е време да ги направите. Годината на Дрвениот Змеј ќе донесе нови почетоци, преродба, обнова и иновации, поттикнувајќи нè бестрашно да ги користиме шансите кои ќе се појават на нашиот пат, па дури и ако треба да ризикуваме. Дури и кога сме соочени со предизвици, нема да се откажуваме, туку ќе се бориме за постигнување на нашите цели. На повидок се промени во глобалното и локалното лидерство.
Змејот е полн со енергија и љубов кон животот, па такви ќе бидеме и ние. Претстојните 12 месеци ќе нè научат да живееме во моментот, да ги прегрнеме новите искуства додека им се радуваме на убавите нешта. Всушност, радоста ќе биде она што ќе нè обедини.
Здравјето ќе ни биде во фокусот и ќе бидеме многу физички активни. Ќе има позитивни промени и иновации во медицината.
Претстојната година ќе биде година во која животната средина и глобалното затоплување ќе бидат високо на агендата. Ќе бидеме охрабрени да се грижиме за околината, да садиме повеќе дрвја и да внимаваме како се однесуваме кон нашата животна средина.
Најголеми предизвици ќе ни бидат напнатоста и нервозата предизвикани од брзиот начин на живот и уморот. Треба да се обидеме да ја контролираме импулсивноста и да бидеме пофлексибилни. Не ја злоупотребувајте вашата моќ!
Што ќе ви донесе Годината на Змејот вам? Тоа зависи од вашиот знак, т.е. од вашата година на раѓање. Ако не знаете кој е вашиот знак во кинескиот зодијак, проверете со калкулаторот:
Калкулатор за кинески хороскоп
Стаорец
Стаорецот и Змејот одлично се согласуваат и имаат силна хемија, па претстојната година ќе биде одлична за вас. Промените нема да ве заобиколат, но тие ќе бидат позитивни и посакувани. Да, вашето трпение ќе биде тестирано многупати, но вие одлично ќе се справите со предизвиците.
Научете да ги контролирате вашите емоции, особено ако треба да донесете важна одлука. Внимавајте на деталите и не пропуштајте ништо ако сакате да го изберете она што е најдобро за вас. Кругот на пријатели ќе ви се зголеми.
Обрнете поголемо внимание на цревата, бубрезите и уринарниот тракт.
Љубов
Уживајте во друштво на партнерот. Годината на Змејот ќе ви донесе хармонични односи со саканиот, па нема да сакате да се разделите од него. Време е да пробате нови нешта заедно, да експериментирате во спалната соба или да создадете нова динамика во врската.
Ќе ви се допаѓа помислата да имате покрај себе некој кој ќе ве сака и заштитува. Ако сте соло, ќе тргнете во потрага по партнер и голема е веројатноста да го сретнете идеалниот за вас.
Работа
Годината на Змејот носи одлична среќа на финансиски план за родените во знакот Стаорец. Иако ќе се соочите со некои предизвици, одлично ќе ги искористите можностите кои стојат пред вас. Во 2024 година ќе работите за да заработите и ќе ги покажете вашите вештини на работното место. Доброволно ќе поминувате екстра часови на работа, бидејќи ќе го обожавате она што го правите.
Во кариерата, бидете претпазливи. Не барајте краток пат кон успехот или брза заработка, бидејќи тие нема да постојат за вас. Наместо тоа, останете во вашата комфорна зона, не ризикувајте и движите се полека, но сигурно кон успехот.
Вол
Волот и Змејот имаат хармонична врска, но не можат да создадат длабоко пријателство. 2024 година ќе биде успешна за вас, но тоа нема да биде без предизвици. Не смеете да дозволите стравовите и несигурностите да ве дефинираат како личност. Насочете се кон збогатување на вашите знаења и стекнување нови вештини.
Змејот ќе ве води кон запознавање нови пријатели. Друштвениот круг ќе ви се зголеми и ќе истражите еден целосно нов свет.
Многу од вас ќе започнат да создаваат сосема нови навики од оние кои ги имале претходно. Ви претстојат промени во стилот на живот. Можно е да се соочите со стрес поради прекумерното работење. Пробајте нови хобија, тоа ќе ви помогне да си ги пренасочите мислите.
Љубов
Со партнерот само ќе се зближувате во годината управувана од Змејот. Запознајте се подобро еден со друг, без разлика колку долго време сте заедно. Секој проблем кој претходно сте го имале, сега ќе започне да се решава. Не го споделувајте љубовниот живот на социјалните мрежи, бидејќи така ќе создаде бариери кои тешко ќе можете да ги надминете.
Љубовниот живот ќе ви цути ако сте сингл. Зачестете ги излегувањата и не се плашете да запознавате нови луѓе, бидејќи оваа година ќе запознаете некој со кого ќе сакате да го поминете животот.
Работа
Имате решителност, трпеливост, фокус и вештини за да постигнете големи нешта во вашата област на работење. Можно е да ве наречат „лидери“ во вашата сфера или пак „иноватори“. Не се плашете да преземете иницијатива.
Многу родени во вашиот знак ќе научат да штедат пари за да ги вложат во нешто што ќе им носи постојан приход. Не се надевајте дека ќе се збогатите од игри на среќа или од други извори на пасивна заработка.
Тигар
И Тигарот и Змејот се моќни суштества и заедно создаваат средина погодна за успеси, можности и просперитет. Користете ги одличните шанси кои ќе ви се појават на патот, среќата ќе биде на ваша страна. Ова е одлична година за патување.
Преземете одговорност за сопствениот живот и започнете жестоко да се борите за она што го сакате. Имајте на ум дека клучот за отворање на многу врати се крие во добрата комуникација. Добриот збор навистина ќе отвори железни порти за вас.
Хуманоста ќе биде уште една од карактеристиките кои ќе ве красат. Но, додека им помагате на другите, најдете време и за себе. Во спротивно, можно е да се соочите со стрес, намален имунитет и хроничен умор. Потребен ви е бистар ум за да ги донесете најдобрите одлуки.
Љубов
Не брзајте да влезете во врска. Во Годината на Змејот морате добро да ги запознавате вашите додворувачи пред да донесете одлука да ги пуштите во вашето срце. Дајте си време за да ги слушнете инструкциите на вашето срце, но бидете подготвени и да ги слушнете ставовите и советите на луѓето кои веќе го поминале вашиот пат.
Ако сте веќе во врска, можни се недоразбирања со партнерот поради лоша комуникација. Научете подобро да слушате, да бидете трпеливи и да се почитувате. Покажете разбирање и лесно ќе ги решите конфликтите.
Работа
Фокусот ќе ви биде на зголемување на заработката во годината управувана од Змејот и лесно ќе успеете во вашата намера. Змејот може да му помогне на Тигарот да заработи пари, тие се одлични бизнис партнери. Нема да имате притисоци на работното место и постојано ќе си ги подобрувате перформансите. Не се обидувајте да покажувате моќ.
Бидејќи ќе имате огромна самодоверба и ќе верувате дека носите правилни одлуки, ќе успевате лесно да си ги постигнете зацртаните цели. Ниту еден предизвик кој ќе го донесе Годината на Змејот нема да биде преголем за вас.
Пазете се од личности кои ви завидуваат или сакаат да го искористат вашиот труд.
Зајак
Насмевнете се, ви претстои прекрасна година. Во Годината на Змејот ќе си исполните многу желби кои досега само ги испраќавте кон небото, но за да се случи тоа, ќе морате напорно да работите. Среќата нема да ви биде послужена на послужавник, за неа ќе треба самите да се изборите. Го можете вие тоа!
Змејот и Зајакот можат одлично да живеат заедно и не влегуваат во конфликти. Оваа година ќе им се радувате на вашиот социјален живот и на зголемената мрежа од деловни контакти. Стојте подалеку од личности кои постојано озборуваат или кои сакаат да им наштетат на другите.
Нема да имате големи промени кога е во прашање вашето здравје. Можни се проблеми поврзани со главата или долниот дел од телото, како главоболки или болки во нозете.
Љубов
Грижете се за желбите и потребите на вашиот сакан. Во Годината на Змејот многу е важно да се почитувате еден со друг и да бидете „синхронизирани“. Разговарајте почесто и правете компромиси во име на љубовта.
Оние со статус сингл ќе имаат нов почеток или ќе запознаат некој со потенцијал за долга врска. Нова љубов е на хоризонтот, но само ако се осмелите да го отворите срцето. Не оставајте простор за недоразбирања и погрешни толкувања на вашите зборови. Комуницирајте јасно и гласно со додворувачите.
Работа
Ако работите, ќе заработите! Во годината управувана од Змејот ништо нема да доаѓа кај вас без труд. Нови можности ќе ви тропнат на вратата, па засукајте ги ракавите и фрлете се на работа. Ова не е погоден месец за ризикување со пари или за тргување со акции во несигурни сектори. Играјте на сигурно.
Следете си вашите амбиции. Ќе имате големи шанси да ги сместите вашите замисли во реалноста. Бидете флексибилни и брзо адаптирајте се на променливите услови.
Можно е некој ваш колега да започне да ви поставува пречки при остварувањето на вашите цели. Избегнувајте ги конфронтациите со таквите личности и умислено дистанцирајте се од нив.
Змеј
Сите очи ќе бидат насочени кон вас, бидејќи ова е ваша година. Ќе добивате огромно внимание, можеби дури и поголемо отколку што посакувате. Ако не сте навикнати да бидете во центарот на случувањата, ова може да се покаже како стресна година за вас. Но, ако научите да ја користите популарноста во ваша корист, ќе имате екстремно успешна година.
Научете да балансирате меѓу желбата да ги следите амбициите и потребата од одмор. Тоа е клучно за да имате успешна година. Кога е здравјето во прашање, можно е да се соочите со респираторни проблеми поврзани со загадениот воздух. Редовно одете на планина или на други места со чист воздух. Ќе обожавате да бидете надвор.
Бидете претпазливи не само со новите пријатели кои сега ќе пристигнат во вашиот живот, туку и со старите. Не споделувајте премногу информации за себе.
Љубов
Шармантни и атрактивни ќе бидете во годината управувана од Змејот, па воопшто нема да биде чудно што ќе привлекувате толку големо внимание. Слободно можете да се наречете среќници, бидејќи ќе ја пронајдете вашата вистинска љубов. Голема е веројатноста тоа да се случи кога најмалку очекувате.
Паровите не само што ќе се согласуваат меѓусебно, туку и одлично ќе комуницираат со членовите од двете семејства. Ако планирате бебе, Годината на Змејот ќе ви ја исполни желбата за проширување на семејството. Важно е да разговарате со партнерот доколку пред вас застане некој проблем. Побарајте го неговото мислење и слушнете ги неговите совети.
Работа
Одлучно следете ги вашите амбиции во годината управувана од вашиот знак. Време е да достигнете до нови висини во вашата кариера. Годината на Змејот за вас е година на напредок, самоподобрување и откривање на нови можности за развој.
Сакате да заработите екстра кеш? Лесно ќе можете да намирисате каде има можности за дополнителна заработка и ќе ги користите. Некои претставници на вашиот знак ќе претворат свое хоби во извор на приходи.
Не се плашете да учите нови нешта, особено кога тие се поврзани со технологијата. Области како Вештачка интелигенција и Роботика ќе ви го привлекуваат вниманието.
Змија
Годината на Змејот нема да биде без предизвици за вас. Ќе морате да научите многу нови нешта и трудољубиво да работите за да имате успешна година, но тоа не е нешто со што не можете да се справите. Како личности кои не сакаат неуспеси и брзо учат, лесно ќе ги надминете пречките за да си ги постигнете целите. Фокусирајте се на истражување и планирање, не препуштајте ништо на случајноста.
Змејот ќе ве предизвика да си го промените начинот на размислување и да правите смели чекори, ќе го тестира вашето трпение, но и ќе ве направи многу посилни отколку што бевте претходно. За среќа, ќе имате прекрасни луѓе околу себе, кои ќе ве поддржуваат во сè што ќе правите. Очекувајте зголемување на популарноста.
Морате да се грижите повеќе за вашето здравје. Бидете физички активни и не претерувајте со работење. Менталното здравје е исто така важно, избегнете ги стресните ситуации.
Љубов
Годината на Змејот ќе ви ја истакне привлечноста, ќе ви донесе многу комплименти, како и многу нови обожаватели. Сепак, за да ја пронајдете вистинската љубов ќе ви биде потребен подолг период. Не се задоволувајте со малку, туку продолжете да трагате. Среќата ќе им се насмевне на најтрпеливите. Зачестете ги излегувањата.
Ако сте во врска или брак, ќе имате многу моменти за паметење од Годината на Змејот. Заборавете на тврдоглавоста и ароганцијата, бидејќи тие ќе бидат најголемите непријатели на хармоничните односи. Научете да се ислушувате и да се почитувате со партнерот. Многу претставници на вашиот знак ќе се израдуваат на вест за бременост или проширување на семејството.
Работа
Не го губете вашето скапоцено време на проекти кои воопшто не ви се важни. Во Годината на Змејот морате да се фокусирате на конкретните цели кои сакате да ги постигнете во животот. Да, за да ги постигнете, ќе морате многу да учите и да стекнувате нови вештини. За среќа, ќе имате покрај себе искусна личност која ќе ви стане ментор и ќе ве научи на сè што ви е потребно за да напредувате.
Претстојната година ќе ви донесе многу нови можност за заработка. Но, морате да бидете претпазливи и да ги избегнувате непотребните ризици. Инвестирајте само во сектори кои нудат долгорочна стабилност.
Коњ
Кога Коњот чекори на територијата на Змејот, може да се соочи со подеми и падови, но тие меѓусебно си помагаат и можат добро да соработуваат. Претстојната година ќе ви биде непредвидлива. Избегнувајте го носењето на импулсивни одлуки.
Интересни луѓе ќе се појават на вашиот пат. Не се плашете да излегувате со нови друштва и да си ја зголемувате мрежата од пријатели.
Време е да се откажете од некои ваши лоши навики кои знаете дека му наштетуваат на вашето здравје. Ако не спречите, ќе треба да лечете. Нездравиот начин на живот ќе ви донесе големи предизвици. Морате да се пазите од повреди доколку практикувате некаков спорт или поинтензивна физичка активност.
Љубов
Змејот ќе ве фрли под рефлекторите, но вие ќе го обожавате целото внимание што ќе го добивате. Многу нови обожаватели ќе се распрашуваат за вас, сакајќи да дознаат нешто повеќе. Не брзајте да влезете во нова врска. Комуницирајте со оној што ви се допаѓа, но дајте си време вистински да го запознаете.
Ако имате партнер, не треба да дозволите кариерата да ви застане на патот кон успешна врска. Поминувајте квалитетно време со партнерот. Дури и кога имате зафатени распореди, крадете мали периоди од денот во кои ќе уживате заедно. Покажете му дека го сакате дури и кога сте километри подалеку од него.
Работа
Вие обожавате да се натпреварувате, но овогодишната конкуренција на работното место нема да биде лесна за надминување. Многумина ќе се обидат да ви застанат на патот, но ако сте посветени на она што го работите, нема да успеат во нивните намери. Ако сега започнувате сопствен бизнис, играјте според правилата. Нема да има кратенки кон успехот за вас.
Кога се парите во прашање, ќе имате позитивни промени во состојбата на банкарската сметка. Финансиската стабилност којашто ќе ја постигнете ќе ве радува.
Коза
Змејот ѝ е како „голем брат“ на Козата и ја насочува низ животот, помагајќи ѝ да си ја зголеми самодовербата и да си ги оствари плановите. Претстојната година ќе ви биде година на самооткривање и самоподобрување. Целосно ќе си го трансформирате животот, избирајќи нов пат за себе.
Нови хобија, нови интереси, посета на нови места, запознавање нови луѓе... Сето ова ќе биде ваша реалност во Годината на Змејот. Иако најчесто ги ставате туѓите интереси пред вашите, оваа година треба да го направите спротивното. Посветете си време и себеси.
Можно е да се соочите со намален имунитет во месеците кои ни претстојат. Не само што треба повеќе да се грижите за здравјето и да создавате добри навики, туку треба да ја ставите на преден план и вашата безбедност. Научете да си ги контролирате емоциите.
Љубов
Очекувајте позитивни промени во романтичниот живот. Годината на Змејот ќе ви донесе возбуда и нова љубовна искра. Важно е да барате партнер кој ќе ве почитува и кој ќе има слични вредности како вашите. Добро запознајте ја личноста која ви се допаѓа пред да одлучите да ја бакнете.
Нема да се чувствувате изгубено и несигурно оваа година. Напротив, точно ќе знаете што сакате и како да го постигнете. Зголемената самодоверба позитивно ќе ви се одрази на врската со партнерот, бидејќи тој ќе ве гледа со поголема почит. Зголемената страст и интимноста ќе доведат до вести за бременост за многу родени во вашиот знак.
Работа
Како личност со претприемнички дух, Годината на Змејот може да се покаже како создадена за вас. Новитетите ќе ве усреќуваат, па ова е идеален период за да ги остварите вашите замисли за промена на професијата или отворање сопствен бизнис.
Конечно ќе најдете време за да ги финализирате проектите, обврските и договорите кои ги одложувавте во изминатиот период. Многу од вас ќе вратат заем, ќе издадат свој труд или ќе го продолжат образованието. Знаењето ќе биде сила.
Избегнувајте ги ризиците во Годината на Змејот. Бидете внимателни доколку одлучите да инвестирате и избирајте проекти со низок ризик.
Мајмун
Змејот носи стабилност во животот на Мајмунот, што значи дека во претстојната година животот ќе ви се гради на цврста основа. Луѓето кои најмногу ве сакаат ќе ви даваат силна поддршка, правејќи да се чувствувате благословени. Многу можности на секое поле ќе ви донесат претстојните година дена.
Запрашајте се кои се ваши силни страни? Потоа најдете начин да ги истакнете и развиете. Користете ги вашите природни таленти како ваша предност. Иако ќе се соочите со некои предизвици во Годината на Змејот, со трудољубивост и посветеност, ништо нема да е невозможно за вас.
Стремете се кон фит изглед оваа година. Редовно тренирајте и хранете се здраво. Можни се проблеми со респираторниот систем, па колку што е можно почесто одете на чист воздух на планина.
Љубов
Дали верувате дека секој од нас има своја сродна душа? Вие ќе ја пронајдете вашата во годината управувана од Змејот. Со вродената харизма која ќе ја поседувате нема да имате никакви проблеми за да му го освоите срцето на оној што ќе ви го фати погледот. Љубовта ќе изненади некои претставници на вашиот знак кога ќе се појави на најнеочекувано место.
Радоста, топлината и разбирањето ќе ја красат вашата врска ако веќе сте го пронашле Вистинскиот. Недоразбирања може да се појават само ако сте нечесни и неискрени во комуникацијата со партнерот.
Работа
Ќе блеснете во целиот свој сјај оваа година и брзо ќе се искачувате нагоре во кариерата. Сепак, нема да го правите тоа само поради имиџ, туку ќе сакате и да заработите. Парите ќе ви бидат многу важни. Не се стремете кон промена на професијата, туку кон подобрување во сегашната. Брзо ќе учите, ќе ги усвојувате знаењата и ќе си ги подобрувате вештините. Инвестирајте во вашето образование.
Родените во вашиот знак ќе бидат одлични тимски играчи во Годината на Змејот. Не бегајте од групните проекти туку кажете им големо ДА.
Солидни приходи ќе имате во месеците коишто доаѓаат, но ќе бидете склони кон прекумерно трошење. Обрнете му поголемо внимание на вашиот буџет, однапред планирајте ги трошоците и не купувајте импулсивно.
Петел
Петелот и Змејот имаат одлична врска. Змејот се грижи за петелот, но таа грижа честопати може да биде претерана и да му ја ограничува слободата на Петелот. Можностите да се истакнете и да ги покажете вашите таленти ќе бидат насекаде. Вие ќе бидете дел од најхаризматичните личности оваа година.
Дефинитивно ќе привлечете прекрасни луѓе во вашиот живот. Сите ќе ве обожаваат, бидејќи животот е полесен со личности како вас во него. Голем предизвик ќе ви биде да одлучите кои лица ќе ги оставите покрај себе, а кои не. Запомнете дека не може сите да ви бидат пријатели.
Ако не знаете како да се ослободите од негативните чувства создадени поради грешките во минатото, дозволете им на пријателите да ви помогнат. Тие веќе ја знаат вашата вредност и ќе ви помогнат и вие да ја видите. Стојте подалеку од стресните ситуации. Посветете им поголемо внимание и на физичкото и на менталното здравје.
Љубов
Вие сте личности кои трагаат по совршенство и се перфекционисти, но обидете се да не го пренесувате тоа во вашата врска. Прифатете го партнерот онаков каков што е, редовно комуницирајте со него и ценете ги неговите ставови. Змејот ќе ви го осветли шармот, па не се изненадувајте ако партнерот не сака да се оддели од вас.
Нови можности за романса ќе имаат сите соло претставници на знакот Петел. Не брзајте! Најпрво треба да научите да се сакате и почитувате самите себе ако сакате и другите да го прават истото. Само ако сте сигурни дека сте пронашле партнер каков што заслужувате, отворете го вашето срце.
Работа
Очекувајте брзо темпо на работа и натрупан распоред во Годината на Змејот. Можете да очекувате успеси ако брзо се адаптирате на промените и научите да работите во хаотична средина. Тргнете ги ограничувањата кои сами си ги поставувавте. Тестирајте ги вашите граници, ќе се изненадите кога ќе сфатите колку многу можете да растете. Покажете го пред светот вашиот потенцијал.
Соработките со други луѓе како вас ќе ви ги зголемуваат шансите за поголема заработка. Ако гледате дека не можете сами да си ги постигнете целите, можеби е време да се здружите со некого.
Куче
Годината на Змејот ќе ви донесе прекрасни нешта. Најголем предизвик ќе ви биде да ги задржите. Покажете поголема сериозност и одговорност. Престанете да го живеете животот од денес за утре и започнете посериозно да го планирате. Промените доаѓаат, дочекајте ги подготвени.
Луѓето ќе ја обожаваат вашата енергија. Секојпат кога ќе организирате некој настан, многу луѓе ќе се појавуваат на него. Зголемените контакти ќе ви донесат и зголемени можности на сите полиња од животот.
Годината на Змејот ќе ви го исполни телото со енергија и мотивација за да ги постигнете вашите највисоки фитнес цели. Ова не е година кога ќе си барате изговори, туку кога храбро ќе се борите за промените кои ги посакувате. Сепак, здравјето треба да биде на прво место. Можни се проблеми со бубрезите и уринарните патишта. Пијте повеќе течности.
Љубов
Зачекорете подалеку од вашата комфорна зона во љубовта. Само преку експериментирање и смели потези ќе го пронајдете Вистинскиот за вас. Ќе се изненадите кога ќе сфатите дека постојано сте барале на погрешно место.
Ако сте во врска, ќе чувствувате дека таа станува сè посилна со секој изминат ден. Да, ќе се соочите со низа предизвици, но секојпат кога ќе ги надминете, ќе чувствувате дека сојузот со партнерот ви е поцврст и поцврст. Морате да сфатите дека со вашиот сакан сте дел од ист тим. Работете заедно со него, не против него за да одржувате здрав баланс во вашата врска.
Работа
Во Годината на Змејот ќе ги откриете вашите скриени моќи и ќе го ослободите вашиот потенцијал. Ќе сфатите дека единствените ограничувања во вашиот живот биле оние кои самите си ги поставувавте. Ова е одлична година за патување, продолжување на образованието и нови проекти.
Состојбата на банкарската сметка само ќе ви се подобрува. Ќе имате сериозно зголемување на заработката, но потребно е да бидете претпазливи со трошењето. Многу често ќе постапувате импулсивно, без да ги планирате вашите трошоци однапред.
Свиња
Свињата и Змејот одлично соработуваат и супер се разбираат. Но, честопати Змејот се однесува шефовски кон Свињата. Треба посветено и трудољубиво да работите за да си ги постигнете целите оваа година. Мислете на иднината, ова не е година во која треба да гледате наназад кон минатото.
Нова надеж и среќа ќе ви го исполнат телото во Годината на Змејот. Ќе си ги зголемите популарноста и авторитетот. Со задоволство ќе преземате иницијатива и водство, а она што го посакувате, ќе се исполнува. Можно е да се соочите со семејни проблеми или да треба да решите семејни прашања поврзани со наследство. Негувајте силни врски со најмилите и не ги земајте здраво за готово.
Здравјето може да ви се влоши ако дозволите недостигот на енергија да ви го контролира животот. Редовно одделувајте си време за физичка активност. Колку повеќе ќе вежбате, толку поживи ќе бидете. Користете ја вашата тврдоглавост на позитивен начин. Можни се проблеми со уринарниот тракт или бубрезите.
Љубов
Трпение, спасение! Во годината управувана од Змејот комуникацијата со партнерот треба да биде смирена и нормална. Зборувајте отворено и искрено со него ако сакате да ги избегнете недоразбирањата.
Не брзајте да влезете во врска. Додворувачи ќе имате многу, но не треба да ја прифаќате првата покана за љубовен состанок која ќе ја добиете. Дајте си време да ги запознаете личностите кои ве симпатизираат. Изгледот не треба да ви биде пресуден кога избирате партнер.
Работа
Прекрасни професионални можности ќе ви донесе Годината на Змејот, но ако сакате да ги „исцедите“ максимално, ќе морате да стекнете нови вештини и да бидете подготвени да учите. Имате одлични шанси да добиете зголемување на платата, унапредување или признание. Оние кои поседуваат свој бизнис, сега ќе имаат можност да го прошират. Верувајте им на вашите инстинкти и ризикувајте, среќата ќе биде на страната на најсмелите.
Финансиската состојба ќе ви биде одлична, но морате да си ги подобрите вештините за менаџирање со парите. Инвестициите ќе ви донесат позитивни резултати. Ако сметате дека не можете да носите правилни одлуки сами, консултирајте се со експерти. Со помош на некој од нив ќе стигнете до голема добивка.
