Големината на градите е многу чувствителна тема за многу жени. Жените со мали гради особено се преокупираат со своето деколте и тоа најчесто им влијае на самодовербата.
Ако имате ниска самодоверба поради тоа што вашите гради се мали, дознајте како можете да ги зголемите визуелно преку едноставни, но ефективни трикови.
Малите гради може визуелно да се зголемат со помош на облеката.
Зголемување на градите со помош на облеката
- Соодветен градник. Нема жена која не знае колку е важен изборот на градник. Сепак, многу често се случува да си купиме градник само поради неговиот изглед, а не поради тоа што ни одговара нам. Ако забележите дека прерамките постојано ви паѓаат, ве сечат по кожата или имате црвени линии откако ќе го соблечете градникот, тоа значи дека е време да си ја подновите долната облека. Градникот е одличен сојузник за убави гради.
- Купувајте градници со „push-up“ ефект, кои ги подигнуваат градите.
- Користете силиконски или сунѓерести перничиња за додавање на волумен. Но, не претерувајте, затоа што може да изгледа премногу вештачки.
- Прекрстете ги прерамките на градникот на грбот. Левата прерамка закачете ја на десната гајка на грбот, а десната на левата. Така моментално ќе ги подигнете градите и ќе ги зголемите на изглед.
- Затворено или несиметрично деколте. Овој тип на деколте помага визуелно да изгледа дека имате пошироки рамена и поголемо деколте.
- Избегнувајте длабоки деколтеа со V израз. Длабоките деколтеа ги истакнуваат коскестите гради и го привлекуваат вниманието кон вашите гради. Никогаш не комбинирајте блузи со длабоко деколте со V израз со ¾ должина на ракавите.
- Кошули со мали џебови на градите. Џебовите помагаат градите да изгледаат поголеми.
- Светла облека. За вашите гради да изгледаат поголеми, треба да носите блузи и кошули во светли бои. Најчесто жените кои имаат мали гради се пошироки во долниот дел на телото. Ако тоа е случај и кај вас, носете темни панталони и светли блузи. Доколку сакате да бидете облечени во иста боја, на пример виолетова, носете панталони во темна виолетова, а блуза во посветла виолетова. Така ќе успеете да му дадете тежина на горниот дел од телото и да постигнете рамнотежа. Доколку претпочитате темни бои, гледајте на нив да има светли детали во областа на градите. Пример: изберете црна блуза што има хоризонтална црвена линија во областа на градите.
- Набор или фалти на градите. Блузите и фустаните со наборот им даваат волумен на градите.
- Мали шарки и хоризонтални ленти. Заборавете на големите шарки, избирајте облека со мали или средни по големина шарки. Големите шарки ќе направат вашите гради да се изгубат во нив. Хоризонталните ленти се одличен начин да ги зголемите градите. Комбинирајте блузи со светли хоризонтални тенки ленти и темни здолништа.
- Избегнувајте премногу широка и премногу тесна облека. Широките блузи уште толку ги израмнуваат градите, а вие токму тоа сакате да го избегнете. Но, не носете и премногу тесна облека, затоа што тоа ќе го истакне обликот на градите. Најдете средина.
- Дебели плетени блузи и ролки со високи јаки. Блузите и џемперите со широка плетка им даваат волумен на градите, а ролките со високи јаки го прават деколтето пообемно и поголемо.
- Гол грб и без ракави. Фустаните и блузите со гол грб го оттргнуваат вниманието од предната страна на телото и се многу секси. Жените кои имаат мали гради најчесто имаат и слаби раце, па најдобро е да ги истакнете убавите раце и секогаш кога сте во можност носете блузи без ракави. Блузите и фустаните кои се врзуваат на вратот се одличен избор ако имате мали гради. Тие ги истакнуваат рамената, визуелно го зголемуваат деколтето и ставаат акцент на грбот.
Зголемување на градите со помош на шминка
Холивуд е место каде што со помош на шминката се прават чуда. Професионалните шминкери можат целосно да го променат изгледот на славните, па затоа холивудските ѕвезди многу често се критикувани кога ќе бидат видени или фотографирани без шминка.
Една од тајните на Холивуд е зголемувањето на градите со помош на шминка. Се разбира, оваа техника сега поретко се користи затоа што силиконските гради добро си ја вршат работата.
Една од убавиците од филмското платно, Кира Најтли, признава дека и таа ја користела техниката за зголемување на градите со помош на шминка за филмот Pirates of the Caribbean.
Споредете го деколтето на Кира Најтли на црвениот тепих и на снимањето на филмот Пиратите од Карибите.
„Ми ги цртаа градите за филмовите, а тоа е невообичаено, затоа што тоа е уметност што изумира. Во минатото имаше посебни оддели во студијата за снимање посветени за шминкање на градите. Мене ми се допадна, затоа што за прв пат имав големи гради и тоа без операција“ – открила Најтли.
Многу полесно е визуелно да направите градите да ви се поголеми кога ви е покриено деколтето, а ако треба да носите свечен фустан со откриено деколте, работите се малку покомплицирани. Но, и за тоа има решение – едноставно применете го овој холивудски трик:
- Потребна ви е камена пудра во темна и светла нијанса и четка за нанесување на пудра.
- Ставете градник за подигање на градите и облечете се. За да ја заштитите облеката, ставете салфетки на рабовите.
- Нанесете од темната пудра по вертикалната линија помеѓу градите. Започнете од долу, па движете се со четката нагоре. Неколку пати поминете нагоре-надолу, за да ја разнесете пудрата.
- Потоа во горниот дел, каде што завршува линијата, започнете да се движите кон надвор, формирајќи ја буквата V и движејќи се по облините на вашите гради. Со четката лесно разнесете ја пудрата за да не се познава строга линија.
- Земете од светлата пудра и нанесете на горниот дел од градите што ви се истакнува над облеката. Разнесете го добро со четката.
Користете понежни нијанси за да не изгледа зголемувањето вештачки. Гледајте се во огледало и внимавајте и двете гради да изгледаат еднакво. Ќе бидете изненадени од ефектот!
