Празничната сезона е совршен изговор за да ја извадите на виделина гламурозната дива што се крие во вас. Се разбира, тоа не значи да се накитите како светкава новогодишна елка со безброј блескави детали, туку со балансирано комбинирање да го истакнете најдоброто во вашиот вечерен стил на облекување.
За инспирација за претстојните вечерни забави, ви предлагаме неколку од најактуелните трендови за урбан и шик изглед.
Асиметрично здолниште
Асиметричните здолништа „високо-ниско“ експлозивно влегоа на модната сцена и добија кренати палци од модните зависнички желни за промени. Освен фустаните, не помалку модерни се и сукњите од ваков тип, кои најчесто се комбинираат со кошула или поедноставна маичка и долг ѓердан.
Едноставен фустан со накит „украсена јака“
И на најобичното фустанче кое долги години ви стои во плакарот можете да му дадете модерен изглед со зашивање на украсена јака, или пак, со помош на накит за на врат кој имитира јаки.
„Кожени“ панталони со впечатлива блуза/кошула
„Кожените“ панталони најпрво станаа селебрити тренд и без оглед на обликот на нивното тело, многу холивудски ѕвезди им отстапија место во своите плакари. Набрзо потоа, кожените панталони, кои во минатото беа отфрлани како моден грев, ги преплавија улиците и станаа „must-have“ модно парче за посилен вечерен изглед.
Фокус на панталоните
Дозволете им на панталоните да говорат гласно за вашето чувство за стил. Прескокнете ги здодевните црни панталони и изберете панталони со принт или во силна боја. Зачинете го аутфитот со неколку модни додатоци и ќе бидете спремни да лудувате до зори.
Пеплум фустан
Фустаните кои ставаат акцент на колковите ќе ја потенцираат тенката половина на која сте работеле во текот на изминативе месеци. Па, „пеплум“ фустаните се одличен избор за забавен почеток на новата година.
Блескав краток фустан и минимален накит
Сведете го накитот на минимум и изберете помалку впечатливи обувки и чанта ако одлучите да блескате со светкав фустан. Премногу блескавиот изглед воопшто не е привлечен за очите, а освен тоа ќе изгледа како да сте се труделе премногу да станете кралица на вечерта.
Трендови кои треба да ги имате на ум
- „Златен“ накит. Накитот со златен сјај го достигна врвот на популарноста. Независно дали сте избрале црна, бордо, смарагдно зелена, бежова или кафеава комбинација, златниот накит секогаш ќе ја надополни со луксузниот ефект.
- Чантичка како мала кутија. Малите чантички кои наликуваат на украсена кутија за накит се задолжителен моден додаток за вечерните забави.
