Да се храните здраво за време на бременоста е најдоброто нешто што можете да го направите за вас и за вашето бебенце. Затоа, ќе се обидеме да ви помогнеме да добиете претстава кои храни заслужуваат повеќе внимание, а кои треба да ги избегнувате.
Во текот на бременоста консумирајте повеќе зеленчуци, овошје, житарки и зрнеста храна, кревко месо.
Што е корисно?
Не постои магична формула која што ќе ви каже што да јадете за време на бременоста. Главно треба да се насочите кон консумирањето на повеќе зеленчуци, овошје, житарки и зрнеста храна и кревко месо.
Фолна киселина
Фолната киселина е потребна за формирање на плацентата и правилното развивање на плодот. Таа е одговорна за создавањето на мозокот и грбниот столб на бебето, уште во првите месеци од бременоста. Консумирањето на доволно количество Б9 (фолна киселина) ја намалува веројатноста за појава на дефекти на мозокот или грбниот столб на новороденчето за 70-80%.
Препорачани дневни потреби: 600-800μg. Максималното количество фолна киселина кое е безбедно да го внесете е 1000μg.
Извори на фолна киселина: спанаќ, брокули, карфиол, црн дроб, телешко и јагнешко месо, сите темнозелени зеленчуци, морков, диња, авокадо и леб.
Калциум
Калциумот е потребен за вие и вашето бебе да имате цврсти коски и заби. Ако не внесувате доволно калциум во текот на бременоста, бебето ќе земе калциум од вашите коски. Калциумот помага за правилно функционирање на нервниот и кардиоваскуларниот систем.
Препорачани дневни потреби: 1000μg.
Извори на калциум: млекото и млечните производи како јогурт, сирење, кашкавал и изварка. Но, исто така калциумот се среќава и во брокулите, спанаќот, кинеската зелка и житариците.
Железо
Железото е дел од секоја клетка на телото и има огромна улога во создавањето на силен имунолошки систем. Кај бремените жени, кои што имаат дефицит на железо, има голем ризик од предвремено раѓање и мала телесна тежина на новороденчето.
Препорачани дневни потреби: 27mg.
Извори на железо: црвено месо без маснотии, месо од живина и риба, спанаќ, леќа, јагоди, житарици, грав, суво овошје и јаткасти плодови.
Протеини
Многу бремени жени не знаат колку се важни протеините како за нивното, така и за здравјето на нероденото бебе. Бремените жени треба да внесуваат поголемо количество протеини, затоа што тие се неопходни за растењето на бебето.
Препорачани дневни потреби: 71g.
Извори на протеини: кревко црвено месо без маснотии (јагнешко, телешко), јајца, риба, месо од живина, млеко и млечни производи.
Што да избегнувате?
Навистина консумирањето на риба е корисно, но не треба да се претерува. За време на бременоста не треба да се консумира риба повеќе од два пати неделно.
Особено треба да се избегнува месо од ајкула, сабјарка и треба да се ограничи внесувањето на туна. Овие меса содржат жива, која што ако се консумира во големи количини може да му наштети на развивањето на нервниот систем на бебето.
Не се препорачува ниту консумирањето на жива морска храна како остриги или школки.
Алкохолот треба да се смета како забранет за време на бременоста. Иако нема докази дека малото количество алкохол може да му наштети на фетусот, најдобро е да го избегнувате целосно. Консумирањето на алкохол се сврзува со предвремено породување, вродени дефекти и мала телесна тежина на новороденчето.
Кофеинот треба да се ограничи на 300mg дневно. Треба да знаете дека освен во кафето, кофеин има и во чајот, некои газирани сокови и чоколадото.
Особено треба да сте внимателни со внесувањето на витаминот А. Храните кои што содржат големо количество витамин А, како џигерот, треба да се избегнуваат.
Непастеризираните сирења и млечни продукти треба да се исфрлат од исхраната. Тие се асоцираат со бактеријата листерија, која може да му наштети на вашето бебе.
Храната која што ја јадете треба да биде целосно зготвена. Ако јајцата или местото не се доволно готвени, ризикувате да се заразите со некоја бактерија.
Колку калории ви се потребни?
Некои луѓе сметаат дека бремените жени треба да јадат двојно повеќе. Но, тоа ни приближно не е вистина, затоа што на бремените жени им се потребни само 300 дополнителни калории дневно.
Триста калории се внесуваат многу лесно. Избегнувајте ја брзата храна, која што изобилува со калории. Внесувајте ги тие дополнителни 300 калории преку зеленчук и овошје.
Важно!
Не се обидувајте да го намалите внесувањето на калории за време на бременоста. Диетата може да ви нашети и вам и на вашето бебенце.
