На Светскиот ден за подигнување на свеста за аутизмот, кој беше на 2 април, се раширија инспиративни приказни од светот.
Таква е животната приказна на Силвија Греко и нејзиниот син Николас, кој е слеп и има аутизам. Инспиративната мајка од Бразил детално му го раскажува на уво на синот секој фудбалски натпревар на тимот Палмејрас за тој вистински да може да ја доживее атмосферата и да знае што точно се случува на теренот.
Никој не знаел за оваа мајчинска посветеност, сè додека лицата зад камерите за време на еден натпревар во 2019 година не забележале дека Силвија зборува нонстоп и дека навива на увото на нејзиниот син. Тогаш FIBA дозна дека синот на Силвија е слеп и дека таа му го раскажува целиот меч на уво.
Приказната за дуото мајка-син стана хит на интернет, а на Силвија ѝ ја донесе наградата од FIFA за „Најдобар фан“.
Николас се родил пет месеци предвреме со ретинопатија, која резултирала со губење на видот. Покрај слепилото, 17-годишниот тинејџер има и блага форма на аутизам.
Николас ја има наследено љубовта кон фудбалскиот клуб Палмејрас од неговата мајка. И покрај слепилото, тој присуствува на секој нивен натпревар заедно со мајка си.
„Моето раскажување е нешто кое доаѓа од моите емоции, не сум професионалец. Сè што гледам и чувствувам, му пренесувам нему, дури и кога сакам да пцујам по судијата... Му опишувам детали: овој играч носи кратки ракави, бојата на неговите копачки, бојата на косата.“
„Тој пее, навива, ме прегрнува... Ги доживува игрите со голема возбуда. Ги користиме до максимум работите кои тој сака да ги прави, како фудбал и музика. Во 2020 година, беше на финалето на Копа Либертадорес, а отпатува и во Катар за да го следи тимот на СП.“
„Во сите овие години со Николас се чувствував невидливо. Денес, луѓето сфаќаат дека постојат луѓе со попреченост, а спортот има моќ да им ги промени животите“ – рекла Силвија.
