Градот под Исарот го завладеа макфестовска еуфорија. Mакедонскиот фестивал на забавни мелодии со 39-тото издание привлече млади и надежни пејачи и истакнати музички имиња кои две вечери ќе ја забавуваат публиката желна за нови хитови.
На црвениот тепих на првата вечер дефилираа дебитантите, водителите Марјана Станојковска и Димитар Атанасовски, а се појави и Јован Јованов кој учествувал на Фестивалот во повеќе улоги, а со групата Магија и песната „Магија“ победи во 1998 година.
Фестивалот започна со настапот на Вера Јанковиќ, која ги отпеа „Твоите очи сине“, „Сонце за три светови“ и „Свирете ја зајди, зајди“. Поранешната водителка на Фестивалот беше облечена во креација од Елена Лука.
13 новокомпонирани мелодии одекнаа на сцената во Домот на културата „Ацо Шопов“ во Штип, а од нив пет беа селектирани за повторна изведба во рамките на втората вечер. Така, вечерва ќе ги видиме Сања Тодоровиќ со „Јас сум виновна“, The Solution со „Ти и јас“, Мирјана Митрева со „Плачев во себе“, Тамара Волческа со „Кажи ми да знам“ и Калина Александар со „Да не те познавав“ заедно со едни од најпознатите лица од македонската сцена.
На самиот финиш, Андријана Јаневска и Ѓоко Таневски ја однесоа публиката на носталгично музичко патување со незаборавни макфестовски хитови.
Фото: Тоши Трајчев / Femina.mk
