Принцот Вилијам ја побара раката на неговата девојка Кејт Мидлтон и кралското семејство вчера ја објави веста за свршувачката.
Вилијам ѝ предложил брак на Кејт минатиот месец додека биле на одмор во Кенија.
Прстенот со кој била „крунисана“ нивната свршувачка не е обичен прстен. Тоа е истиот свршенички прстен со кој Чарлз во 1981г. ја побара раката на принцезата Дајана.
„Тој е вистински романтичар“ – го пофалила Кејт својот свршеник, опишувајќи го моментот кога Вилијам ѝ предложил.
Лево: принцот Вилијам и Кејт. Десно: прстенот на Лејди Ди
28-годишната Кејт признала дека предлогот за брак многу ја изненадил и дека воопшто не очекувала да се случи.
„Бевме таму со пријатели, па воопшто не очекував. Беше тотален шок. Многу сум возбудена“ – продолжила да раскажуваа среќната Кејт.
Принцот Вилијам изјавил дека и прстенот и неговата свршеница му се многу важни во животот и дека било правилно да ги соедини.
„Како што можете да го препознаете, тоа е свршеничкиот прстен на мајка ми и е многу специјален за мене, исто како што е и Кејт. Праведно беше да ги спојам двете. Тоа е мојот начин да се осигурам дека мајка ми нема да го пропушти овој ден, возбудата и фактот дека ние ќе го поминеме целиот живот заедно“ – изјавил Вилијам.
Прстенот е направен од овален сафир од 18-карати кој е опкружен со 14 мали дијаманти.
Кралската свадба се очекува да се одржи во текот на пролетта или летото наредната година.
