Црвена Hermès Birkin чанта постави рекорд за најскапа чанта продадена на аукција. Луксузната чанта му беше продадена на анонимен купувач за неверојатни 203.150 долари.
Крокодилската чанта, која е декорирана со 18-каратно бело злато и дијаманти, се очекуваше да достигне цена од 80.000 долари, но очигледно последната понуда ги надмина очекувањата на експертите.
„Тоа е извонреден примерок на едни од најисклучителните чанти на светот и ова е необична цена, која во секој поглед ги надмина нашите највисоки очекувања“ – изјавил Мет Рабинер, претставник на Heritage Auctions, за WWD.
Биркин чантите се изработуваат рачно од француската модна куќа Hermès и се симбол на богатство поради високата цена и ексклузивноста. Именувани се според актерката Џејн Биркин, а нивната цена се движи од 9.000 до 150.000 долари.
