Филмските ѕвезди го напуштаат Холивуд и од 11 до 22 мај се селат во францускиот град Кан за да бидат дел од добро познатиот Кански филмски фестивал.
Филмски премиери, борбата за Златната палма, славни талентирани гости, стил, елеганција и по некоја модна грешка... сето тоа го прави овој фестивал еден од најпрестижните настани во филмската индустрија.
Фестивалот започна вчера со прикажувањето на романтичната комедија „Midnight in Paris“, чиј режисер е Вуди Ален. Но, она што ги привлече објективите на новинарите беше појавувањето на некои од најугледните ѕвезди на Холивуд.
Ума Турман и Џад Лоу стапнаа на црвениот тепих како дел од овогодишното меѓународно жири, предводено од Роберт Де Ниро.
Роберт Де Ниро, Ума Турман, Џад Лоу
41-годишната висока убавица пристигна во бел фустан со долги ракави на Dolce & Gabbana, а потоа за нејзиното појавување на црвениот тепих таа избра прекрасна тоалета на Versace.
Селма Хајек и Антонио Бандерас на фестивалот го промовираат својот најнов филм „Puss in Boots“. 44-годишната актерка пристигна во креација на Gucci, а подоцна се преслече во долга тоалета од колекцијата Gucci Couture.
Антонио на црвениот килим дојде држејќи се за рака со неговата сопруга Мелани Грифит, со која слават 15 години брак.
Рејчел МекАдамс, која заедно со Карла Бруни и Овен Вилсон учествува во „Midnight in Paris“, се појави во бел фустан на Maxime Simoens Couture, а за вечерната церемонија се преслече во долга тоалета на Marchesa. Бидејќи здолништето ѝ беше долго повеќе од 1 метар, таа постојано добиваше помош од својот партнер, Мајкл Шин, со кого за прв пат се појавуваат заедно.
На црвениот тепих се појавија и убавицата од Боливуд, Аишварија Раи, облечена во асиметрична тоалета на Elie Saab и манекенката Каролина Куркова, облечена во тоалета од колекцијата Armani Privé.
На фестивалот ќе се појави и Анџелина Џоли, а се очекува нејзе да ѝ се придружи и Бред Пит.
