Неговиот лик во популарната серија „The Big Bang Theory“, Раџ Кутрапали, можеби има фобија од жени, но тоа воопшто не се однесува на реалниот живот на Кунал Најар. Индискиот актер на 22 декември минатата година стапи во брак со поранешната Мис Индија, Неха Капур, а сега „People“ објави интересни фотографии од шестдневната свадбена церемонија.
Кунал и убавата Неха славеле шест дена во Њу Делхи, а на свадбата имало 1.000 гости.
Традиционално, еден ден пред свадбата 28-годишната Неха добила и привремена тетоважа со хена. „Сите жени добиваат хена тетоважа и сите мажи пијат Bloody Mary. Мажите ги хранат жените, бидејќи тие треба да почекаат да се исуши тетоважата“ – изјавил Најар. Биле потребни три часа за да биде направена тетоважата на невестата.
Најар пристигнал на венчавката качен на коњ и со „превез“ на лицето, бидејќи според обичаите никој не треба да го види пред да пристигне на местото на кое се одржува церемонијата.
Кунал и Неха се запознале пред три години и оттогаш тој е заљубен во неа. „Ме обзеде чувство на смиреност. Бев толку сигурен и се чувствував толку комфорно. Дури ни поезијата не може да објасни како се чувствував за оваа жена“ – раскажал Најар за првиот момент кога ја запознал Неха.
„The Big Bang Theory“ во моментов доживува огромен успех и е втора најгледана хумористична серија во САД, веднаш по „Two And A Half Men“.