Инспирирана од времињата на радост, оптимизам и просперитет, а дефинирана од модата во 20-тите и безвременскиот стил нa холивудски дами од 50-тите како Одри Хепберн и Грејс Кели, новата колекција на Rosa Clara зрачи со женственост и елеганција.
Изгледот од 20-тите години на минатиот век е постигнат со фустани со спуштен струк, отсуство на волумен и арт деко дезени извезени со кристали и сребро. Од друга страна, изгледот од 50-тите е доловен со волуменозни фустани со принцески здолништа, извезени цветови и скапоцени камења кои ја акцентираат женствената силуета, кратки ракавици и болероа.
Дизајнерката Роза Клара, која често е нарекувана „шпанската Вера Ванг“, неодамна ја доби наградата Дизајнерка на венчаници на годината во текот на Модната недела во Мајами.
Барбара Палвин и Сара Сампајо ја продолжија соработката со шпанскиот бренд, па можеме да ги видиме на фотографиите за каталогот 2014.
