Стево Пендаровски и Елизабета Ѓоргиевска беа во дводневна официјална посета на Грција.
58-годишниот претседател и 49-годишната прва дама на Северна Македонија беа пречекани со високи државни и воени почести од страна на грчката претседателка Катерина Сакеларопулу.
За свеченоста во Атина, Елизабета носеше црвена креација со црни копчиња креирана во соработка со македонската дизајнерка Ирина Тошева.
„За оваа важна посета, по желба на г-ѓа Елизабета Ѓоргиевска, се одлучивме за безвремената класика, разиграна со различни копчиња во форма на медалјони, надополнета со дезенирани детали во внатрешноста на ракавите, како мој препознатлив дизајнерски печат. Удобноста и пријатноста при ваквите настани се особено важни и големо внимание посветивме и на бирањето на материјалот, кој беше од локално производство“– изјави Тошева за Femina.mk.
За време на посетата, Ѓоргиевска ја посети Националната галерија во Атина, во придружба на Лина Мендони, министерка за култура и спорт на Грција.
Претседателот Пендаровски оствари средба и со премиерот Киријакос Мицотакис.
Официјалната посета на претседателот Пендаровски на Хеленската Република претставува прва историска посета што се реализира на највисоко ниво меѓу двете држави.
На средбите беше констатиран позитивниот тренд на севкупните билатерални односи помеѓу двете држави, но и дека постои потенцијал за понатамошно зајакнување на соработката на секое поле. Беше изразено задоволство дека двете држави го оставија минатото зад себе и се фокусирани кон иднината.
