Џесика Хасинто цели да ги промени перцепциите на луѓето за убавината, да го потсети светот дека секој човек е убав на свој начин и да не дозволи ништо да ѝ застане на патот до остварувањето на сонот да стане познат модел.
22-годишната девојка од Венецуела за првпат зачекори на модна писта во 2019 година, а оттогаш реди само нови и нови модни ангажмани.
„За мене моделството е како да студираш нешто што го сакаш, за кое имаш страст. Само што ќе зачекорам на пистата, се претворам во друга личност. Како некој друг да постои во мене и наеднаш да се појавува. Се чувствувам моќно“ – изјавила Џесика.
Секој кој работи со Хасинто има само позитивно искуство и е шармиран е од нејзината мотивација и харизмата.
„Ние сме различни, но не сме инфериорни“ – вака е насловен проект на Црвениот крст во Венецуела во кој учествувала Џесика.
„Проектот ми покажа дека можам да направам сè што ќе посакам и дека можам да извршувам различни активности. Благодарение на тоа, сега сум во академија за танц и за лизгање на мраз“ – објаснила Хасинто.
За остварувањето на сонот, на Џесика најмногу ѝ помогнала нејзината мајка со која има специјална врска.
