Доменико Долче и Стефано Габана креираа модна ода на мајките. Дизајнерското дуо во Милано презентира женствена колекција која го слави мајчинството.
Viva la Mamma!
„Зборот mamma не е мода, се разбира дека не е. Тој значи бескрајна љубов. Сите идеи ги зедовме од деца. Да, модата е важна, но сакавме да понудиме нешто реално, а не само облека, облека, облека. Преку модата можеш да зборуваш за нешта кои имаат поголемо значење. Живееме во мрачни времиња, но сакаме да ги потсетиме сите дека со љубов, можеш да промениш сè“ – рекол Стефано.
Пред манекенките да го започнат дефилето, на сцената застанаа 11 мајки со своите деца. Бремената Бјанка Балти, долгогодишната муза на Долче и Габана, измами аплаузи кога зачекори на пистата во нежно розова креација. И неколку од манекенките дефилираа со своите малечки.
Детски цртежи и слогани за љубовта кон мајките прекриваа многу од креациите. Значаен мотив беше и црвената роза, но не само затоа што тоа е цвеќето кое се подарува во Италија за Денот на мајките, туку и затоа што омилен спомен од детството на Стефано му е мирисот на роза на црвениот кармин на неговата мајка.
Сè беше во знакот на мајките. Долче и Габана го преведоа на 14 јазици хитот „Viva la Mamma“ на Едоардо Бенато и го вклучија во белешките за модното шоу.
