Многу често, жените кога имаат малку повеќе пари не можат да се воздржат да не купат нешто. Некои не можат да дочекаат да излезат од продавница и сакаат цел свет да знае што си купиле, но има и такви кои потоа се чувствуваат виновни за потрошените пари и се обидуваат да ја сокријат вистинската цена од својот партнер.
Во истражување спроведено од популарното женско списание Marie Claire, во кое учествувале 1 500 жени на возраст од 20 до 40 години, дури половина од учесничките признале дека го лажеле својот сопруг или партнер за тоа колку трошат за себе.
Но, понекогаш не е само цената. Жените учеснички во истражувањето признале и дека за 40% од купените козметички продукти нивниот партнер воопшто и не знае.
Како коментар на овие резултати, Триш Халпин, главниот уредник на списанието, изјавила: „Додека порано ова се случуваше понекогаш за некој пар чевли, сега жените редовно кријат што купуваат“.
Сепак, треба да земеме во предвид дека ова истражување е направено помеѓу жени кои се вработени и кои имаат свои приходи. Кај нас можеби ситуацијата е малку поинаква и тешко е некоја жена да си купи нешто без нејзиниот сопруг да дознае за тоа. Но, мора да се признае дека понекогаш навистина жените го лажат својот партнер за цената на купените работи.
