Заврши натпреварот во излежување во селото Брезна во Црна Гора.
Црногорката Лидија Марковиќ е победник во натпреварот кој траеше 50 дена и ги сруши сите рекорди. Таа заедно со Гордана Филиповиќ и Филип Кнежевиќ беа последните останати натпреварувачи од пријавените 21. По откажувањето на Гордана, Лидија и Филип се договориле да го прекинат натпреварувањето, а Филип како вистински џентлмен, победата ѝ ја отстапил на својата конкурентка, која си заминала со премијата.
Тие на сите југословенски народи и на политичарите сакаат да им испратат порака дека со љубов и слога, сè се решава.
23-годишната козметичарка пред неколку дена изјави дека сè се сведе на психолошка игра меѓу преостанатите тројца кандидати и на некаков личен инает. Бидејќи обожавала да се излежува, воопшто не ѝ било тешко да стигне до финалето.
Натпреварот започна на 18 август, а на учесниците им било дозволено на секои 8 часа да прават пауза од 15 минути за да одат во тоалет, да се истушираат, да тренираат и сл.
Црна Гора е единствена земја во која се одржува ваков натпревар, а сè започна од митот дека Црногорците се мрзливи и многу лежат. Претходниот рекорд беше 117 часа.
