Контроверзниот сајт BeautifulPeople.com, кој се промовира како „сајт за запознавање забранет за грди луѓе“, пред два дена лансира виртуелна банка за сперма и јајца чии донори се само убави луѓе.
Преку услугата Beautiful Baby Service сите луѓе кои сакаат да станат родители на убаво бебе можат да си најдат донор, а сопствениците „великодушно“ решиле дека таа услуга можат да ја користат и грдите луѓе.
Почетната страница на сајтот BeautifulPeople.com
„На почетокот се двоумевме дали да ја прошириме услугата и за неубавите луѓе. Но сите, дури и грдите луѓе, сакаат да донесат на свет убаво дете и ние не можеме да бидеме себични со нашиот „базен“ од атрактивни гени“ – изјавил основачот Роберт Хинце.
Менаџерот Грег Хоџ пак додал: „Привлечноста е еден од првите квалитети кои луѓето сакаат да ги поседува нивното дете. Сите ние сме поотворени и попријатно се чувствуваме во близина на привлечни луѓе и секој би сакал неговото дете да има колку што е можно повеќе предности. Не велиме дека убавината е единствената добра особина. Интелектот исто така е важен, па можеби МЕНСА може да направи нешто слично со нивните членови“.
Основачите тврдат дека не го прават ова за финансиска добивка, туку дека оваа услига е одговор на зголемената побарувачка за атрактивни донори.
BeautifulPeople.com очигледно сака да ја зголеми својата популарност со контроверзија. Тоа е истиот сајт којшто по божиќните празници избрка 5000 свои членови само затоа што се здебелиле.
Сајтот е лансиран во 2002 година и има 600 000 членови од 190 земји од светот.
