20 нешта кои сакам мојата ќерка-тинејџерка да ги запомни

Мајка освојува срца со моќно писмо за ќерка ѝ која започнува да плови низ бурните тинејџерски води.

Во светот на технологијата и социјалните мрежи, Мер Ли од Бостон се надева дека ќе ја научи ќерка си да се цени себеси за она што е во сржта. Таа смета дека децата, а особено девојчињата, треба да знаат дека се доволно добри и убави онакви какви што се.

А еве ги 20-те нешта кои таа посакува да ги запомни нејзината ќерка-тинејџерка:

Писмо до мојата ќерка-тинејџерка...

Мое девојче, како стигнавме толку брзо дотука?

Како вчера да беше кога те држев на мојот колк, а денес имаш свои колкови.

Сите ме предупредуваа за овие години. „Само почекај да стане тинејџерка“ – ми велеа. Како тоа да беше нешто страшно.

Но, јас не чувствувам толку голем страв, колку што чувствувам тежина. Чувствувам дека овие години се тешки. И за првпат, те оставам да ги носиш сама. Бидејќи овие тешки одлуки, овие тешки ситуации, мора да бидат твои.

Иако не можам да те носам низ овие години, се надевам дека можам да ти понудам некои мудри зборови кои патем ќе ги носиш со себе. Знам дека не сакаш или немаш потреба секогаш да го слушаш мојот совет, но се надевам дека ќе запомниш...

Запомни да го слушаш своето тело. Имаме вграден радар кој може да детектира опасност. Кога чувствуваш дека телото те предупредува, верувај му.
Запомни дека не си само бројка. Не си бројка на вагата. Не си бројка на тестот. Не си бројка на лајкови или следбеници. Ти си неизмерно неверојатна личност, онаква каква што си.
Запомни дека искреноста секогаш ќе биде твоја најсилна страна. Биди искрена со пријателите, со семејството и што е најважно, со самата себе. Живеењето по твојата вистина секогаш добро ќе ти се одрази.
Запомни да ги држиш пријателите блиску и шепнувај им на уше ако имаат нешто на забите или во носот. И најди пријатели кои веруваш дека ќе го направат истото за тебе.
Запомни дека не мора да останеш. Ако некоја ситуација прави да се чувствуваш неудобно, спакувај си ги работите и замини си во кое било време. Не е важно колку долго си седела таму претходно. Секогаш го имаш изборот да станеш и да си заминеш веднаш.
Запомни дека „Не“ е целосна реченица. Границите се твое право. Постави ги со добри, цврсти намери.
Запомни дека ако некогаш се најдеш на маса со пријатели кои бараат од тебе да се промениш како личност, време е да си најдеш нова маса. Или подобро, создај си своја маса кога е целосно инклузивна.
Запомни да го носиш она во што се чувствуваш комфорно, а не она што мислиш дека изгледа комфорно за светот.
Запомни дека ако твоите пријатели одат во темнина, не е твоја работа да ги извлекуваш оттаму. Наместо тоа, седни покрај нив и понуди им ја твојата светлина.
Запомни кога ти е даден избор, избери љубезност.

НО...

Ако љубезноста го компромитира твојот интегритет, стави го интегритетот на прво место, бидејќи не ја заслужува секој човек твојата добрина.
Запомни да не се кикотиш кога некое момче ќе направи да се чувствуваш непријатно. Спротивстави му се.
Запомни дека некои луѓе ќе ти го свртат грбот затоа што пресилно сјаеш. Ти продолжи да сјаеш, бидејќи тоа не е за нив. Ти сјаеш за тебе.
Запомни да одделиш време за твоите баба и дедо, за твоите тетки, вујковци и братучеди... Твоето семејство е твое богатство.
Запомни да си нарачаш тоа што ти се јаде. Животот е премногу краток за да пропуштиш добро јадење.
Запомни, ако некој ти рече дека си „премногу“, љубезно кажи му да оди да си најде некој што е „помалку“.
Запомни дека татко ти може да биде страшен... но, ти исто така ме имаш мене за да те заштитам од секого кога треба.
Запомни да ја почитуваш твојата дива страна. Онаа која те повикува да плачеш на дождот, да танцуваш со ветерот, да ја тресеш Земјата со грмотевици и да се смееш со виножитата.
Запомни, ти ми си ќерка, но не си моја. Ти си личност која ја израснав да биде своја.