Принцезата Кетрин се врати на кралските должности додека води тешка здравствена битка и минува низ хемотерапија. 42-годишната припадничка на британското кралско семејство се појави на роденденската парада на кралот Чарлс.
На настанот „Trooping the Colour“, Кетрин изгледаше отмено во бела креација од Џени Пекам со црно-бела панделка кај вратот и шешир од Филип Трејси.
На почетокот на церемонијата, таа се вклучи во кралската поворка во кочија со трите деца – 10-годишниот Џорџ, 9-годишната Шарлот и 6-годишниот Луи. Потоа, семејството се обедини на балконот на Бакингемската палата.
На Кетрин ѝ беше дијагностициран рак по операцијата на стомакот на почетокот на годината. Сопругата на принцот Вилијам прима хемотерапија како превентивна метода за спречување на ширење на болеста. За моменталната состојба, таа сподели:
„Добро напредувам, но како што знае секој кој минува низ хемотерапија, има добри и лоши денови. Во лошите денови се чувствуваш истоштено, уморно и мораш да го одмориш телото. Но, во добрите денови, кога се чувствуваш посилно, сакаш да го искористиш тоа до максимум.“
