Потврден е првиот случај на смрт од коронавирус во нашата држава. Министерот за здравство Венко Филипче ја соопшти тажната вест на прес-конференција.
Станува збор за 57-годишна жена од Куманово, која била дијагностицирана посмртно.
Филипче соопшти:
„За жал го имаме и првиот смртен случај од коронавирусот, кој постсмртно во Куманово беше дијагностициран доцна синоќа. Се работи за жена која имала 57 години. Во однос на приемот и третманот, сакам да кажам дека колегите постапиле согласно протоколот за изолација. Навремено се земени два теста. И двата теста иницијални покажале негативен резултат. Но и покрај негативните резултати, заради тоа што болеста била типична за коронавирусот, таа била третирана во изолација.“
„Тој период на хоспитализација траел изминатата недела во Општата болница во Куманово, а брис е повторно земен после констатација на смртта, во текот на вчерашниот ден и тој бил позитивен. Брисот е земен заради наглото влошување на состојбата, заради што тоа е нетипично за друга болест, и тоа ги натерало колегите повторно да се посомневаат и земат уште еден, трет брис.“
„Заедно со неа е хоспитализиран и нејзиниот син, 2-3 дена после неа во текот на минатата недела. Тој има 33 години. Вчера настанало влошување на состојбата и прво бил префрлен во одделот за изолација на Клиниката за пулмологија и после според протоколот, префрлен на Клиниката за инфективни болести каде што е сега сместен во стабилна здравствена состојба.“
