Откако Врховниот суд ѝ го одзеде старателството над синот Александар, Северина доби море поддршка од обожаватели и славни личности.
51-годишната пејачка вети дека до крај ќе се бори за своето чедо, а објави и емотивно видео со инсерти од заеднички моменти со него. Во позадина се слуша глас, кој вели:
Некаде помеѓу „тогаш и сега“, премина од „Мамо, престани да ми кажуваш што да правам“ во „Мамо, те молам кажи ми што да правам“.
Некаде помеѓу „тогаш и сега“, премина од „Мамо, ти не разбираш“ во „Мамо, не разбирам“.
Некаде помеѓу „тогаш и сега“, премина од „Мамо, остави ме намира“ во „Мамо, никогаш не ме напуштај“.
Некаде помеѓу „тогаш и сега“, сфатив дека другата половина од моето срце отсекогаш била личноста која го создаде.
Во описот на видеото, Северина им се заблагодари на сите за поддршката и сподели дека постојано добива пораки од мајки кои поминале низ истата голгота како неа.
„Во овие тешки времиња, непроценливо е што знам дека постојат луѓе кои ми испратија илјадници и илјадници пораки, како некоја заедничка молитва, како здружена хуманост. Секоја од нив ја прочитав по неколку пати, ми се мешаа солзи и радост што чувствувам дека луѓето се секогаш тука кога е во прашање неправда. Случајот со моето дете не е единствен, ми пишаа многу мајки, а јас од оваа ноќна мора се извлекувам така што им ветувам дека ќе им помогнам. Искрено, и јас не знам како, но ова е некој мој повик одгоре и ќе одам до крај.“
„Ви благодарам на сите за човечноста и што ми помогнавте со вашите прекрасни пораки“ – напиша таа.
