Најмладиот пациент е 2-годишно детенце, најстариот има 91 година, најмногу заразени се од возрасната група 30-39 години... Ова е само дел од статистиката за коронавирусот во нашата држава.
Секој од нас будно ја следи здравствената криза и ги анализира информациите. Па, што велат официјалните податоци на Институтот за јавно здравје досега?
Статистика за вкупниот број заболени
Во нашата земја потврдени се вкупно 148 случаи на коронавирус.
Возраст: Најмладиот пациент е 2-годишно детенце, а највозрасниот има 91 година. Најголем број заболени, односно 35 (23,6%), се од возрасната група 30-39 години.
Извор: Институтот за јавно здравје
Пол: Што се однесува до полот, распределбата е речиси рамномерна. Имено, регистрирани се 73 машки и 75 женски лица.
Место на живеење: Најмногу случаи има во Скопје (88), па следуваат Дебар (40), Куманово (8), Штип (7), Кавадарци (2), Охрид (2) и Гостивар (1).
Извор: Институтот за јавно здравје
Симптоми: Најчесто се регистрирани кашлица (68,6%), температура (62,9%), слабост (28,6%), болка во грло (25,7%), главоболка (24,8%) и треска (21,9%), а 43 лица се без изразени симптоми.
Број на направени тестови: Тестирани се вкупно 1.236 материјали од кои 776 во Институтот за јавно здравје, а 460 во „Жан Митрев“.
Извор: Институтот за јавно здравје
Здравствени работници: Имаме 12 случаи на заболување меѓу здравствените работници.
Хоспитализација: Само 32 лица се/биле хоспитализирани во текот на болеста, а 116 се на домашно лекување или во домашна изолација, асимптоматски или со полесна клиничка слика.
Исход: Една пациентка беше излекувана и пуштена дома, 2 случаи завршија фатално, а преостануваат 145 активни случаи.
Статистика за изминатото деноноќие
Денеска на пладне беше објавено дека има 12 нови случаи и тоа 7 од Скопје и 5 од Куманово. Половина од нив имале контакт со лице кај кое била утврдена дијагноза КОВИД-19 во државата.
Најголем дел од новите случаи припаѓаат во возрасната категорија 30-39 години, а во однос на полот, станува збор за 7 машки и 5 женски лица.
Четири од позитивните лица се хоспитализирани додека останатите се на домашно лекување.
Вкупно биле направени 232 тестови од кои 100 во „Жан Митрев“, а другите во Институтот за јавно здравје.
