„Кажи ми како без тебе да бидам?“, „Грутка во грлото, солзи во очите. Не сте сами“, „Од алчност децата ги претворивте во пепел, а родителите ги завивте во црно“, „Рекордери во Денови на жалост“, „Ќе немаше волку крв да беше по закон“...
Тоа беа пораките на денешниот собир на плоштадот Македонија во Скопје во чест на загинатите во пожарот во Кочани, а секој натпис копа нова рана во срцата и носи горчина во устата.
Илјадници граѓани се обединија во тагата и покажаа солидарност со семејствата на настраданите во трагедијата во Кочани. Се палеа свеќи, се положуваа цвеќиња, беа пуштени црни балони, а со телефонските светла беше создадено ѕвездено небо за збогум со жртвите.
