Гордана Силјаноска-Давкова беше единствена функционерка од нашата држава која присуствуваше на погребната миса посветена на папата Франциск.
Македонската претседателка сподели албум со фотографии направени пред и во базиликата Санта Марија Маџоре во Рим, Италија. На една од нив, таа се ракува со првата дама на САД, Меланија Трамп. Двете дами беа облечени во црно, а Меланија носеше и превез на главата.
На Facebook, Претседателката напиша:
Голема чест ми беше да учествувам во церемонијата на оддавање немерлива почит и во испраќањето на папата Франциск во вечниот дом. Неспорно е дека овој скромен човечки џин го обележа векот, храбро чекорејќи по патиштата на милоста, добрината и човечноста.
Си замина со љубов и солзи во базиликата Санта Марија Маџоре, откако го собра и обедини целиот свет, сиот народ, сите верници и верски великодостоинственици, државници, носители на највисоки функции.
Неговите дела совршено соодветствуваа на неговите зборови и ставови.
Папата Франциск го вложи сиот свој духовен капацитет и морален интегритет
во решавањето на проблемите на обичните луѓе, но и глобалните проблеми и уживаше огромна почит од сите категории луѓе, од најсиромашните, до најбогатите и најмоќните.
За време на неговата историска посета на Скопје, папата Франциск нè охрабри нас, македонските граѓани да опстоиме на својот посебен историски, национален и културен пат, неразделен од европскиот, изразувајќи ни разбирање, симпатија и поддршка.
Папата Франциск почина на 21 април, а последното појавување пред јавноста го имаше еден ден претходно, на Велигден.
