Велигденски идеи кои ќе ве инспирираат да го разубавите домот

Во секој дом започнаа подготовките за големиот празник Велигден. За што повесела празнична атмосфера, покрај традиционалното бојадисување на јајца, се разубавува домот и со велигденски украси, а трпезата се збогатува со декорирани јадења.

Облечете го домот во велигденското руво, црпејќи инспирација од следниве идеи.

Цвеќе во лушпа од јајце

Поканете ја пролетта и празничната еуфорија во вашиот дом со цвеќиња во лушпа од јајце. Лушпата може да ви послужи како минијатурна саксија или вазна. На живо јајце направете му дупка во горниот дел и испразнете го. Ако засадувате цвеќе, наполнете го со земја, а ако го користите само како саксија, налејте малку вода. Поставете го во лушпата омиленото цвеќе.

Декоративни свеќички во лушпа

Создајте свеќички од лушпа кои ќе бидат одлична декорација на вашата трпеза овој Велигден. Испразнете ги јајцата, измијте ги лушпите во кои сакате да правите свеќи и бојадисајте ги во омилените бои. Или ставете мала свеќичка во нив, или прицврстете на нивното дно мал фитил и наполнете ги со стар растопен восок.

Чоколадни јајца

Кој не го сака прекрасниот вкус на чоколадото? Изненадете ги најблиските со чоколадни јајца полнети со омилениот фил или овошје.

Земете неколку мали балони, измијте ги убаво, избришете ги, а потоа надујте ги. Растопете чоколадо и потопувајте ги балоните еден по еден во него. Колку е чоколадото погусто, толку подобро, бидејќи ако е премногу течно, поголем е ризикот да се скрши при отстранувањето на балоните. Внимавајте балоните да бидат потопени до пола или повеќе од пола во чоколадото. Потоа наредете ги на хартија за готвење и оставете ги да се изладат. Ако имате место да ги сместите во фрижидерот, може да заштедите време. Кога чоколадото ќе стврдне, дупнете го балонот на врвот и бавно истушете го. Внимателно отстранете го балонот и наполнете ја чоколадната „лушпа“.

На крајот можете да ги поклопите со уште една „лушпа“ и вашето чоколадно јајце е подготвено за сервирање.

Чоколадни гнезда во лажичка

Децата ќе ги обожаваат чоколадните гнезда, а ни возрасните нема да можат да го сокријат уживањето во ова слатко задоволство.

Подготовката е едноставна. Во растопено чоколадо потопете пластични лажички и ставете ги на хартија за печење. Поросете ги со чоколадни трошки и во средината на секоја од нив ставете бонбони. Оставете ги во фрижидер за да се стврднат.

Кокосова трева

За пролетно да го раззелените вашиот дом не е неопходно да имате вистинска трева, едноставно обојте кокос со зелена прехранбена боја. Кокосовата трева можете да ја користите за подлога за чоколадни јајца или бонбони.

Но, исто така, со помош на кокосовата трева можете да ги претворите колачите, мафините или која било торта, во велигденски десерт. Ставете малку шлаг на површината на тортата и поросете ја со кокосова трева, а над неа наредете бонбони во различни бои.

Декоративни јајца од волница

Јајцата од волница се прават многу лесно, а се вистинско освежување за домот. Потребни ви се мали балони, волница во различни бои, лепило и малку вода.

Во мал сад ставете лепило и разредете го со малку вода. Волницата врзете ја за балонот и намотајте ја околу него. Можете да користите волница во различни бои за јајцата да бидат што поколоритни. Потоа балонот потопете го во лепилото. Врзете го да се суши преку ноќ. Откако ќе бидете сигурни дека е потполно сув, внимателно направете мало дупче во балонот (што поблиску до отворот за дување) за да го истушите.

За да бидат јајцата уште поинтересни, ставете бонбони во балонот пред да го надуете. Откако ќе го дупнете, тие ќе останат во внатрешноста на декорацијата која ќе ја создадете.

Велигденско дрво

Скршете неколку гранки од дрво, најдобро тоа да е расцветано, и ставете ги во вазна. Со помош на лепило прицврстете украсни ленти на празни бојадисани јајца и врзете ги на гранките. Можете и да ги протнете јајцата на гранките.

Мафини во јајце

Наполнете ги јајцата со вашето омилено тесто за мафини и испечете ги за да ги изненадите вашите гости и семејството. Доколку немате идеја, следете го следниов рецепт.

Подготовка

1. Измешајте ги брашното, пецивото и солта во длабок сад.
2. Во поголем сад изматете со миксер едно јајце со шеќерот. Потребно е смесата да биде светла и кремаста, а потоа додајте ја кората од лимон и омекнатиот путер и матете додека нѐ се соединат состојките.
3. Во садот со изматената смеса додајте ги сувите состојки и промешајте.
4. На крајот додајте ја и павлаката и мешајте додека не се изедначи смесата.

На секое од јајцата направете му дупка во горниот дел и испразнете ги. Измијте ги јајцата под чешма, а потоа потопете ги во вода со сол и оставете ги да стојат половина час. Измијте ги со ладна вода и оставете ги да се исушат.

Пред да ги наполните со смесата, во секое јајце ставете малку масло и со вртење обидете се да ги намачкате ѕидовите на лушпата. Наполнете ги јајцата околу ¾ и ставете ги во тава за мафини. Под секое јајце ставете „гнездо“ од алуминиумска фолија за да стојат јајцата исправени. Печете на температура од 180⁰C околу 20-25 минути.