Жените и вежбањето со тегови

Кога сакаат да ослабат и да ја подобрат својата фигура, повеќето жени се насочуваат кон кардио вежби или аеробик. Но, кардио вежбите не се доволни за оформување на цврсто, стегнато тело. Во секоја програма за вежбање треба да присуствуваат и кардио и вежби со тежина.

Вежбањето со отпор или со тегови влијае позитивно како врз изгледот, така и врз физичкото и психичкото здравје.

7 причини зошто жените треба да вежбаат со тегови

Вежбањето со отпор или со тегови влијае позитивно како врз изгледот, така и врз физичкото и психичкото здравје. Еве зошто треба овие вежби да ги вклучите во вашиот план за постигнување на подобар изглед и здравје.

1. Ќе бидете физички посилни. Вежбањето со тегови може значително да ве направи посамостојни и видливо посилни. Така нема да имате потреба постојано да барате помош при извршувањето на секојдневните обврски. Домаќинската работа ќе ви биде полесна, полесно ќе можете да го кренете своето дете во прегратка, а плус и ќе ги намалите шансите за повреди. Истражувањата покажале дека умереното вежбање со тегови може да ја зголеми силата кај жената со 30 до 50%.
2. Ќе имате посилни коски. Вежбите со тегови ја зголемуваат густината на коските и со тоа го намалуваат ризикот од појава на остеопороза. Истражувањата покажале дека ако се практикуваат вежби со кревање тежина во текот на 4 месеци, тоа може да доведе до зголемување на густината на коските со 19%. Остеопорозата е еден од најлошите непријатели на повозрасните жени. Консумирањето на храна богата со калциум, во комбинација со вежбање, е најдоброто оружје во бобата против оваа „тивка“ болест.
3. Кревањето тегови го намалува ризикот од појава на болести. Редовното вежбање со тегови го намалува ризикот од појава на хронични заболувања. Австриски научници откриле дека токму овие вежби го намалуваат шеќерот во крвта кај луѓе со дијабетес тип 2. Со намалувањето на мастите во телото, може и да се спречи развивањето на оваа болест. Вежбите со тегови го намалуваат и крвниот притисок и го намалуваат ризикот од мозочен удар со 40%, а ризикот од срцев удар со 15%, тврдат истражувачите.
4. Вежбите со тегови се добри за мозокот. Истражување во Велика Британија покажа дека редовното вежбање со тегови ја покачува продуктивноста на работниците со 15% во деновите кога креваат тегови, во споредба со деновите кога ја прескокнуваат ваквата физичка активност. Бразилски истражувања пак потврдија дека вежбите со тегови ја подобруваат и краткотрајната и долготрајната меморија и докажаа дека луѓето кои ги практикуваат можат подолго време да се концентрираат и да внимаваат.
5. Вежбите со тегови нема да ве направат да изгледате како бодибилдер. Многу жени се плашат дека ако започнат да вежбаат со тегови, ќе развијат големи мускули како маж. Тоа е погрешно мислење. Женското тело не произведува толку тестостерон како машкото, а токму тој хормон има огромно значење за развивањето на големи и силни мускули. Со нормално вежбање е невозможно жена да оформи голема мускулна маса. Жените бодибилдери вложуваат многу време во вежби, држат соодветна диета и понекогаш земаат хемиски супстанции за да постигнат толку мускулест изглед.
6. Преку вежбите со тегови полесно ќе се справите со стресот и ќе си го подобрите расположението. Можеби ова ќе ве зачуди, но колку повеќе мускулна маса имате, толку полесно можете да се справите со стресни ситуации. Резултатите од едно тексашко истражување покажале дека луѓето со стројна става имаат пониско ниво на хормони на стресот. Друго истражување открило дека по одредена стресна ситуација, крвниот притисок се враќа побрзо во нормала кај луѓе со поголема мускулна маса, отколку кај луѓе со помалку мускули. Вежбањето со тегови може да ви помогне да го пребродите стресот, да ја намалите лутината, да си го подобрите расположението и дури да се борите со депресијата.
7. Со вежбите со тегови ја менувате формата на своето тело. Со вежбањето добивате тонирани мускули. Две жени со еднаква телесна тежина ќе изгледаат сосема различно ако едната има цврсто стегнато тело, а другата опуштено. Вежбањето со тегови ја забрзува работата на метаболизмот, а оформената мускулна маса согорува калории дури и во мирување.

Основни правила

Најдобро е да практикувате и кардио и вежби со тегови.

• Прво вежби со тегови, потоа кардио. Најдобро е да практикувате и кардио и вежби со тегови. Но, во таков случај треба да внимавате секогаш прво да ги правите вежбите со тежина. На телото му се потребни 20-30 минути за да започне да користи масти како „гориво“. Пред тоа користи гликоген. Доколку направите грешка и започнете со кардио вежби, потоа ќе бидете уморни и нема да имате енергија за вежбите со тежина.
• Секојпат вежбајте одредена група мускули. Не се обидувајте во еден ден да правите од сите вежби по малку. Најдобро е да ги поделите вежбите според групите мускули за кои што се наменети. На пример, ако еден ден вежбате за горниот дел од телото, наредниот пат фокусирајте се на вежбите за нозе.
• Правете 48 часа пауза. Дајте им време на мускулите да се опорават. Доволно е да вежбате 3 пати неделно за да постигнете одлични резултати.
• Започнете со мала тежина. Не брзајте веднаш да почнете со голема тежина. Изберете тежина која ќе ги измори вашите мускули по 12-тото повторување. Откако по одреден период со таа тежина ќе можете да направите 15 повторувања со леснотија, зголемете ја малку тежината. Мала болка во мускулите е нормална, но не треба да чувствувате силна остра болка.
• Дишете правилно. Додека вежбате со тежина, не треба да заборавате да дишете. Задржувањето на воздухот може опасно да го покачи крвниот притисок. Секогаш издишувајте кога ги подигате теговите и вдишувајте кога ја спуштате тежината.