Со гламурозни невестински ревии заврши еднодневниот настан „Модна ноќ на невести“, кој започна со шоурум посветен на идните младенци кои го планираат свадбениот ден.
Бројни гости во хотелот „Мериот“ во Скопје синоќа одблиску ги видоа најновите венчаници од неколку брендови. Меѓу моделите кои влегоа во улога на невести беа и Никица Ацева и Ангела Ѓоргиева, заштитни лица на официјалната кампања на настанот, „Marry Me“.
Al Aparel
Al Aparel by Natasa Karceva со колекцијата „Simplicity” го отвори стилското дефиле.
Сензуалната колекција совршено ја истакнува женственоста, преку внимателно одбрани материјали, висококвалитетни тантели, прецизно одбрани кроеви и форми, како и мноштво рачно изработени додатоци, кои на беспрекорен начин го надополнувааат визуелниот ефект на секој од моделите.
Бутик „Лебед“
На пистата за првпат се претстави и бутикот за венчаници „Лебед“ со колекцијата „Urban Princess“, која е круна на 20-годишнината од неговото постоење.
Посветена им е на сите принцези среде урбаниот хаос, кои знаат да го направат вистинскиот избор и уживаат во моментите што ним им значат.
SIGMA Jewelry
Брендот SIGMA Jewelry презентираше елегантен и ефектен накит со кој идните невести можат да го заокружат нивниот свадбен стајлинг.
Menakon Creations
Koсовската модна куќа Menakon Creations се претстави со колекцијата „Il Fiore“, која обединува бои и кроеви што треба да го прикажат „цутењето на една прекрасна душа“.
MCouture
„Crystal collection“ на MCouture донесе гламур и префинетост на сцената, давајќи им стилски предлози на дамите за блескав свадбен изглед.
Внимателно аплицирани камења, бисери, пердуви, цветови и кристали ги збогатуваа ткаенините, а женствените силуети беа спој на класичното и модерното.
Anna Bora
Ателјето Anna Bora ги мамеше погледите на публиката со еклектична колекција.
Експериментирајќи со стилови и фузирајќи класични и футуристички елементи, Елиф Сали создаде креации за дами со различни естетски преференции.
Фото: Александар Буневски за Femina.mk
