Советот на модни дизајнери на Америка (CFDA) одлучи годинава да ѝ ја додели наградата „Модна икона на годината“ на Ријана. На манифестацијата одржана во Њујорк сите погледи беа вперени во 26-годишната пејачка, не само заради тоа што беше главната ѕвезда на вечерта, туку и поради нејзината провокативна облека.
Ријана смело зачекори пред бројните гости и фото-репортери во целосно проѕирен фустан. Дизајнерот Адам Селман ја создал блескавата креација специјално за Ријана. Фустанот всушност е мрежа, декорирана со 230.000 кристали.
„Дефинитивно сакавме да го направиме малку скандалозен“ – изјавил Селман.
Изгледот на Ријана беше комплетиран со розов крзнен шал Pologeorgis, обувки од Маноло Бланик и накит од Пол Морели и Jacob & Co., како и соодветна блескава марама за на глава и ракавици.
Ријана ја прими престижната награда од главната уредничка на „Вог“, Ана Винтур.
