Алесандра Амбросио го краси најновото издание на дигиталното списание „The Edit“. За едиторијалот „Angel In The Sun“, 32-годишниот ангел на Victoria’s Secret позираше во бикини и креации кои ја отскриваат нејзината фигура.
Во интервјуто за списанието, Алесандра зборувала за одржувањето на телото и за лошата пластична операција на ушите која си ја направила кога имала 11 години. Сакајќи да влезе во модната индустрија, таа одлучила да направи корекција на клемпавите уши, но не поминало сè во најдобар ред.
„Пронајдов еден доктор во мојот роден град во Бразил кој имаше направено таква операција само еднаш, па на некој начин бев како заморче. Во текот на првите ноќи по операцијата се чувствував како некој да ми ги има отсечено ушите. Една година морав да одам на дополнителни мали операции... Козметичките операции сега ме ужаснуваат“ – рекла таа.
Амбросио отворено зборувала и за враќањето во форма по раѓањето на ќерката Ања. „Луѓето постојано ми велеа дека веднаш ќе се вратам во форма, но и една недела по породувањето имав голем стомак како балон. Тогаш за првпат во животот морав да бидам на диета“ – раскажала таа.
Додека ја доела малата ќерка, познатата манекенка вежбала по шест пати неделно и консумирала само 1.500 калории дневно за да може да зачекори на ревијата на VS три седмици по породувањето.
Во мај минатата година Алесандра го роди своето второ дете, синот Ноа, и повторно не ѝ беше потребно долго време за да се врати пред камерите.
