Џејн Фонда ја имаше честа да ја додели последната златна статуетка на Оскар 2020. Најголем впечаток од нејзиното појавување на сцената остави нејзината нова фризура и црвеното палто кое го носеше во рацете, а преку кое испраќа моќна порака за зачувувањето на животната средина.
82-годишната актерка блескаше во креација од Ели Сааб, која веќе ја имаше во својот плакар зашто ја носеше пред 6 години на Канскиот филмски фестивал. Неодамна, славната актерка се зарече дека нема да купува повеќе облека.
Фонда ја носеше впечатливата црвена креација во Кан во 2014 година.
Џејн е активистка која се обидува да ја подигне свеста за климатските промени, прекумерниот конзумеризам и еколошката одговорност кај луѓето. Досега, таа била уапсена пет пати за време на нејзините протести, а црвеното палто стана симбол на нејзиниот активизам.
„Го гледате ова палто? Ми требаше нешто црвено и излегов и го најдов ова на распродажба. Ова е последното парче облека кое некогаш ќе го купам. Кога разговарам со луѓето, им велам дека не мораме да одиме на шопинг... дека не ни требаат повеќе работи. Јас морам да им бидам пример за тоа. Па, повеќе не купувам облека“ – изјавила таа неодамна.
На манифестацијата Оскар, Џејн ја додели наградата за Најдобар филм, која отиде во рацете на екипата на „Parasite“.
Фонда не беше единствената ѕвезда која носеше стара креација во Долби театарот.
И Елизабет Бенкс носеше фустан кој е во нејзиниот плакар од 2004 година, а кој беше создаден специјално за неа од дизајнерот Беџли Мишка.
